BINTULU: Nembiak ba nengeri tu meseti nyikap diri ngena mayuh penemu bepelasarka teknologi pemadu baru enggau Artificial Intelligence (AI) dikena nampung juluk ngangkatka Sarawak nyadi nengeri maju bepenatai pemisi tinggi.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg nyemetak madah, nembiak bepenemu nyadi kunchi nyungkak ekonomi menua tu enggau ba rantau ASEAN.
Ku iya, pengelebih Sarawak ba kuasa ulih dikena baru mega diaku Menteri Besai Dato Seri Anwar Ibrahim ti deka ke Sarawak nyungkak pemansang Grid Kuasa ASEAN.
“Nya kebuah, Perintah Sarawak diatu, aku deka nyikap semua kita ngambi mansutka kuasa dikena ngemansang ekonomi ASEAN.
“Nya kebuah, Menteri Besai minta ngagai aku, ulih kini Sarawak nyadi penyungkak kuasa ASEAN Grid,” ku iya bejaku ba Pengerami Nutup Minggu Nembiak Sarawak 2025 ba Balai Suarah Bintulu kena Hari Minggu.
Sama datai, Speaker DUN Sarawak Tan Sri Datuk Amar Mohamad Asfia Awang Nassar, Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah sereta dua Sapit Menteri Nembiak, Lumba enggau Pemansang Orang Dagang Sarawak, Datuk Gerald Rentap Jabu enggau Datuk Dr Ripin Lamat.
Ku premier, pengelebih pengeraja asal dikembuan Sarawak nentuka kandang menua tu ngeluar mayuh kuasa ulih dikena baru ti nyadi pemansut ekonomi baru nengeri tu.
Ku iya, pengeraja asal tu nyadi reta intelek ti deka ngemansang Sarawak lalu ngembuan tanggungpengawa ngelui menua sereta ngemujur juluk nyadi "Star Of ASEAN”.
Berebak enggau nya, iya minta nembiak ngembuan disiplin enggau juluk nyadi tuai dudi hari ti deka ngemudi nengeri tu ba jalai ti betul.
“Enti tuai dudi hari nadai visyen, enda ulih berati ke pengelebih dikembuan, ti enda ulih ngemudi jalai ti betul, nengeri kitai deka enda diadu manah. Nya kebuah, kitai meseti pintar ngadu pekara tu,” ku Premier nyemetak.
Sama datai, Sapit Menteri ba Opis Premier Sarawak (Penyeraris Projek Ungkup Agensi Pemansang Kandang Menua, DBKU enggau Pekara Islam) Datuk Dr Abdul Rahman Junaidi, Residen Bagi Menua Bintulu Datu Nyurak Keti, temuai dipebasa bukai, tuai opis sereta bala nembiak. - EDISI UKAS
