KUCHING: Pemutus berani dikena numbuh Gabungan Parti Sarawak (GPS) pengudah pengelabuh Barisan Nasional (BN) ba taun 2018 nya dikena nentuka hak Sarawak dalam Malaysia terus dijaga.
Premier Sarawak ti mega Presiden GPS, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, empas politik pengudah pengelabuh BN nya udah ngeruga pemansang ba kandang menua tu kelebih agi sekeda projek bwsai baka jematan udah dikinsil Perintah Besai lebuh nua kelebih agi pengudah BN ba penuduk penyakal.
Ku iya, Sarawak meseti lengkas nempa chara baru nentuka hak nya ulih dijaga manah enggau ulih maju bepelasarka pemansut sereta penyerakup rayat.
“Pengudah alah nya, utai ti nyadi nya kami nyadi penyakal lalu tekala nya semua projek strategik kelebih agi ungkup Sarawak udah dikinsil.
“Projek ti meri empas besai ngagai Sarawak kelebih agi ngagai peranak ba menua pesisir nyengkaum bekal ai enggau bekal kuasa karan udah dikinsil," ku iya.
Iya madah munyi nya lebuh bejaku ba Konvensyen Pengari Tiga Taun Sekali Ninting Taun Ke-6 Parti Rakyat Sarawak (PRS), ditu kena Hari Enam.
Ku Datuk Patinggi Abang Zohari, penegap politik asil gempung parti ba Sarawak nentuka kandang menua tu meri perati ngagai pengawa ngiga pun penatai pemisi dikena ngaga baru projek ti udah dikinsil seraya nambah projek ke bisi diatu dikena nyaga pengelantang rayat.
" Pengujung iya, projek ti dikinsil Perintah Besai lebuh nya ditampung kitai ngena chara kitai empu.
“Jematan enggau bekal ai sereta kuasa karan dikemansang, Program Transformasyen Menua Pesisir (RTP), kitai nampung lalu ngemansang infrastruktur ba mengeri enggau menua pesisir nengah chara ti disebut aku nusun baru asil kandang menua," ku iya agi.
Kelimpah nampung projek tu, iya mega ngingatka GPS nengah kerejasama semua parti di baruh nya deka terus ditegi ngambi ngetan hak Sarawak nitih Sempekat Malaysia 1963 (MA63) dikena nentuka hak kandang menua tu tejamin enggau hak nya baka dalam sebarang konstitusyen dititih semua raban.
Sama datai tiga Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr. Sim Kui Hian sereta temuai dipebasa bukai. -EDISI UKAS
Disediaka: Jonnie Kiew
Gambar: Ibanez Jeffery Guang
