KUCHING: Perintah Sarawak deka ngaga jalai baru sepanjai 300 kilometer (km) ari Marudi nyentuk Long Terawan lalu ke Mulu nyadi sebagi ari pengawa negap rentayan jalai alun adap utara kandang menua tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, projek nya mega deka nyambung adap utara nengeri nyengkaum Lawas enggau Limbang.

"Tu deka belabuh taun baru lalu disadang begunaka timpuh empat ngagai lima taun," ku iya lebuh dirandau pemberita pengudah Pengerami Bejadi Konvensyen Pengari Tiga Taun Sekali Ke-6 Parti Rakyat Sarawak (PRS) ditu kena Hari Enam.

Ku iya, projek nya ukai semina ngemuntang akses peranak menua pesisir tang mega nyadi penyungkak pemansang sitak nya dalam ekonomi baru.

Sama datai iya nya tiga Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr. Sim Kui Hian sereta temuai dipebasa bukai. -EDISI UKAS

Disediaka: Nur Nabilla