KUCHING: Perintah nengeri deka ngerumban pengawa ngaga baru Rumah Bidayuh ti angus empai lama ba Kampung Budaya Sarawak nentuka pesaka budaya nya ulih disuman baru.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, sida deka mai pekara nya ngagai kabinet dikena bulih pemendar enggau belanja khas ungkup ngaga baru struktur nya.

“Aku empu deka mai pekara tu ngagai Kabinet laban taman budaya tu tauka kampung budaya tu nengah SEDC,”ku iya.

Iya madah munyi nya ba aum pemberita pengudah ngatur pejalai ngabas Rumah Panjai Bidayuh ti angus di Kampung Budaya Sarawak, kena Hari Enam.

Ku Dato Sri Karim, iya nemu pasal penusah nya lalu deka nentuka penyai ti nyadi ulih diaeruri sereta digaga baru enda lama da.

"Aku nemu lalu deka berati ke pekara tu nentuka penusah enggau penyai ti nyadi tu ulih diseruri tauka digaga baru," ku iya.

Ku iya, nitih ke pansik tumu raban bekuasa, pun penusah angus dipechaya ketegal penanggul sut tali karan enggau struktur baruh begunan agi tegap ngambi dikena ba pengawa ngaga baru begunan nya.

Nambah ke nya, iya nyemetak madah ke pengawa ngaga baru deka dipejalai lengkas berindik ari Taun Nemuai Ke Malaysia deka diatur taun baru.

" Aku deka madah enggau naka pengelengkas kelebih agi laban taun baru nya Taun Nemuai Ke Malaysia.

"Enti kitai ulih ngaga nya pengelama setaun lebih mimit, kitai deka ngaga baka nya," terang iya.

Kelimpah ari nya, Dato Sri Abdul Karim mega nerang, Kampung Budaya Sarawak agi beoperasyen baka selama enggau penatai temuai lokal enggau antarabansa ti terus nemuai ngagai palan dagang temuai ikonik nya.-EDISI UKAS

Disediaka: Betrice Britney Dee
Foto: Betrice Britney Dee