SARIKEI: Tiga projek besai nengah Kaunsil Pelilih Sarikei (MDS) iya nya Palan Pemakai Sarikei, Pasar Sungai Rejang enggau Taba MyKiosk di Taman Susur Jambu udah tembu diseruri dikena nyaga pengelantang enggau matak mayuh agi pengusung ngagai sitak nya.

Ba aum pemberita ti diatur di Balai Baum Ringkat Tiga MDS kena Hari Lima, MDS nerang pejalai meresa kepenudi ungkup ketetiga projek nya udah dipejalai kena 13 Oktober tu tadi begulai enggau Kaban Kaunsil enggau pegawai MDS.

Palan Pemakai Sarikei diatu moden agi enggau ngelantang penguna nengah pengawa nambah jalai ramp OKU, nyendia 128 mija enggau bangku baru, lampu LED sereta ngechat baru beguna ti diias mural berambaika jaku pesaka enggau tradisyen komuniti lokal.

Pia mega, taba MyKiosk di Taman Susur Jambu mega diseruri ngena perambu baru ti nyendia 30 unit MyKiosk Renggat Satu ngagai pedagang enggau pengusung.

Ungkup Pasar Sungai Rejang, pengawa nyeruri mungkur nyendia 20 pemagi lot palan pedaja, nyambung tali karan baru sereta ngelekat lampu LED dikena nambah tikas pengelikun enggau fasiliti dagang.

MDS ngarap pengawa tu ulih ngubah landskap Sarikei, ngeranchak ekonomi lokal sereta matak mayuh agi pengusung seraya ngelalau mensia mayuh begulai nyaga pemeresi enggau perengkaguna mensia mayuh ti disedia. - EDISI UKAS