LUNDU: Dua projek nyeleti jalai kebun dipejalai dikena negap infrastruktur menua pesisir ba sitak Kunsil Nengeri (DUN) Opar nengah Program Transformasyen Menua Pesisir (RTP) ti dipejalai Opis Parit enggau Entali Ai (JPS) Sarawak.

Pengawa Nyerah Taba Projek RTP DUN Opar udah dipenyadi Kaban Kunsil Nengeri (ADUN) Opar, Billy Sujang di Kampung Temaga Melayu enggau Kampung Jugan, kena Hari Lima.

Ku iya, pejalai projek tu nyeremin komitmen perintah nengeri negap infrastruktur pemun menua pesisir nipak juluk Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg nentuka rayat menua pesisir mega ngasai perengkaguna ti lantang enggau likun.

Iya mega meri terima kasih ngagai raban JPS sereta agensi pengatur nentuka genap projek rayat ulih tembu menyana enggau meri pemaik ngagai komuniti.

Projek keterubah nyengkaum Nyeleti Jalai Kebun di Kampung Temaga Melayu sepanjai 584 meter beungkus RM200,000 seraya projek kedua di Gitiek, Kampung Jugan mungkur jalai sepanjai 130 meter beungkus RM100,000.

Pejalai kededua projek tu disadang meri pemaik besai ngagai peranak kelebih agi orang bumai ti bepanggai ngagai pengawa betanam betupi nyadi pun penatai pemisi.

Projek nya deka nambah fasiliti dikena mai asil utai tanam enggau ngemuntang akses ke kebun sereta umai. - EDISI UKAS