SIBURAN: Jalai baru nuju Sekula Primari China (SJKC) Chung Hua ditu siti inisiatif perintah nyaga pengelikun enggau pengelantang raban sekula.

Sapit Menteri Pengangkut Sarawak (Langit enggau Darat), Datuk Dr Jerip Susil madah, pengawa ngaga jalai baru tu beguna amat laban jalai besai ba mua sekula iya nya Jalai Besai Pan Borneo ke mega jalai pemadu kiruh enggau berisiko tinggi.

“Jalai baru tu ukai semina infrastruktur fizikal tang lambang pengibuh perintah ngagai pengelikun nembiak,” ku iya.

Iya nyebut pekara nya lebuh bejadi jalai nya, ditu kena Hari Lima.

Ku Kaban Kunsil Nengeri (ADUN) Mambong nya, pemujur ngaga jalai nya asil kerejasama mayuh raban nyengkaum Kaunsil Mengeri Serian, Opis Tanah enggau Survei, Polis DiRaja Malaysia, Opis Bomba enggau Penyah Penusah sereta sida ti gerah jari nyuaka belanja.

“Kerejasama rat entara komuniti enggau perintah bukti pemansang lokal ulih dijapai nengah semangat begulai,” terang iya.

Ku iya agi, nengah penembu projek tu, SJK (C) Chung Hua Siburan diatu ngasai akses ti likun enggau berurun ari seraris enggau inisiatif Perintah Sarawak negap infrastruktur pelajar ba kandang menua pesisir enggau semak mengeri.

Sama datai, Pegawai Pelilih Siburan Ranum Bari, Chairman Kaunsil Pengatur SJK (C) Chung Hua Siburan Phang Nam Fatt, Kepala Pengajar SJK (C) Chung Hua Siburan Wong Siew Peng, Tuai Balai Polis Pelilih Siburan Mohd Irwan Hafiz Md Radzi enggau Sekretari Kaunsil Pelilih Siburan Hiu Kee Seng. -EDISI UKAS