KUCHING: Pemujur Sarawak bulih setipikit antarabansa ari Gerempung Pelajar, Saintifik enggau Budaya Serakup Bansa Beserakup (UNESCO) bukti penau nengeri tu ngadu enggau nyaga pesaka rampa menua chara pintar sereta bepelasarka prinsip pemeruan.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg meri terima kasih ngagai Kaunsil Kampung Sarawak (SFC) enggau semua raban bekaul pemujur besejarah nya ti mai nama Sarawak ba kar dunya.

“Tu mandangka kitai udah ulih ngintu rampa menua, tanah kitai enggau pintar asil pemujur ti dijapai tu.

“Tu mega nyeremin Sarawak iya nya kandang menua ti ukai semina bejaku ngapa tang diadu enggau chukup manah,” ku iya lebuh bejaku ba Pengerami Makai Lemai Ninting Taun Kaunsil Kampung Sarawak (SFC) ditu kena Hari Lima.

Ku Datuk Patinggi Tan Sri Abang Zohari, pengawa ngaku Gua Niah nyadi taba UNESCO ukai semina nyungkak sektor dagang temuai tang mega ngangkatka taba nya nyadi palan pansik arkeologi betikas dunya berindik ari pengawa tetemu ke sejarah mensia kelia ba taba nya ti engkeman endar ba evolusyen tamadun mensia di rantau tu.

Berebak enggau nya, ku iya, pengawa ngaku Sarawak Delta Geopark mega ngangkat nama nengeri nyadi pengemudi ba pemansang meruan ke alai endur nya diatu benung nuju status UNESCO Global Geopark.

Bela datai ba ba pengerami nya, Sapit Menteri Pengeraja Asal enggau Pemansang Mengeri Sarawak, Datuk Len Talif Salleh sereta Menijar Besai SFC, Abang Arabi Abang Aimran.-EDISI UKAS

Disediaka: Nur Nabilla
Foto: George S. Embie