Sarawak–Singapura Nanggam Kerejasama Nyeridi Rebak Biak Bekaul Rampa Menua

Disiarkan pada 17 Oct 2025
Sumber Berita: UKAS


KUCHING: Sarawak enggau Singapura setuju nanggam siti kerejasama baru ti meri perati ngagai pelajar rampa menua ba rebak biak kelebih agi nengah program betukar nembiak sekula primari enggau sekondari.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya dikerandau begulai enggau Sapit Menteri Besai Singapura, Gan Kim Yong kena Hari Empat.

Ku iya, perambu nya dibantai berindik ari Singapura nadai kampung puang seraya ngujungka mayuh nembiak ba republik nya enda kala meda jelu siga.

“Pagi Hari Lima aku begulai enggau Sapit Menteri Besai Singapura, Gan Kim Yong lalu iya merambu kitai bisi kaul rat ngambi meri siti chara ngagai rebak biak dikena ngelala kampung sereta utai tumbuh enggau utai idup.

“Kitai nemu Singapura nadai kampung lalu mayuh nembiak enda kala meda manuk enggau jelu siga chara semak.

“Nya kebuah, iya enggau aku setuju nembiak sekula primari enggau sekondari ari Singapura datai ke Sarawak nengah program betukar nembiak ngambi belajar pasal rampa menua,” ku iya.

Iya madah munyi nya ba Pengerami Makai Lemai Ninting Taun Kaunsil Kampung Sarawak (SFC) ditu kena Hari Lima.

Ku Premier Sarawak, inisiatif nya ukai semina ulih nambah pengeleda enggau penemu pasal rampa menua ba bala nembiak tang mega meri peluang ngagai SFC bekunsi penau enggau penerang ngagai pengajar sereta nembiak ari Singapura.

Ku iya, inisiatif nya ukai semina ungkup nembiak Singapura tang mega ngaul nembiak ekspatriat di republik nya.

Datuk Patinggi Tan Sri Abang Zohari mega ngena peluang nya merambu ngagai Singapura meri mayuh agi hak penyangkai penerebai ke Sarawak nengah serikat bilun AirBorneo dikena ngemuntang atur program nya.

Premier Sarawak andal inisiatif nya ulih nyadi chunto ngagai kerejasama serantau bukai ba pelajar rampa menua enggau dagang temuai meruan nipak pengeran Sarawak ba pemansang gadung enggau pemeruan rampa menua.

Sama datai iya nya Sapit Menteri Pengeraja Asal enggau Pemansang Mengeri Sarawak, Datuk Len Talif Salleh enggau Menijar Besai SFC Abang Arabi Abang Aimran.-EDISI UKAS

Disediaka: Nur Nabilla
Foto: George S. Embie