AMSTERDAM: Opis Kereja Raya (JKR) Sarawak enggau projek Jalai Sarawak-Sabah Renggat Kedua (SSLR2) nerima basa antarabansa ke penyulut ngaga projek infrastruktur sepengudah bulih Bentley’s 2025 Going Digital Award ba Kategori Jalai Alun enggau Jalai Besai.
Anugerah Going Digital ke diatur Bentley Systems nya, meri basa ke penyulut ngaga projek infrastruktur sereta raban profresional ngemansangka sektor infrastruktur nengah inovasyen digital.
Direktor JKR Sarawak Datu Dr Cassidy Morris nerima anugerah nya sepengudah bejuraika pekara bekaul bakani inovasyen digital dikena ngaga projek enggau tikas pemanah aset ba projek SSLR2 kena 16 Oktober 2025.
“Kami temegah ati ulih mandangka inovasyen digital ke dikena ngaga projek infrastruktur ti meruan.
"Kelebih agi projek SSLR2, gaya tanah ti bebukit ba kandang utara Sarawak begunaka chara ngaga projek ti meruan sereta inovatif.
“Kami nerang ngagai panel akim bakani chara bejalaika pengawa digital ti komprehensif sereta aplikasyen inovatif ti mai ngagai asil ke meruan,” ku iya.
JKR Sarawak mujur ngalahka dua finalis bukai ba kategori Jalai Alun enggau Jalai Besai iya nya, Arcadis (Australia) bagi projek Warringah Freeway Upgrade enggau PowerChina ZhongNan Engineering Corporation Ltd. (China) bagi projek Ecological Highway ari Wong Transnasional Detian ke entara menua Shuolong.
Anugerah Going Digital 2025 nerima semak 250 penyereta ari 47 menua, ti mandangka anugerah pemadu nyulut ba industri injiniring infrastruktur.
Anugerah nya, bisi 12 kategori ke dipilih panel pakar industri global.
Nitih ku Bentley Systems, raban profesional infrastruktur terus ngasilka projek ti manah agi sereta tan taja napi macham penanggul global, nyengkaum ubah klimet enggau suntuk orang gawa ba sektor infrastruktur.
Anugerah nya dikena masa penyulut sereta pengawa ngena teknologi baka Artificial Intelligence (AI), digital twins enggau ke bukai ti nyungkak produktiviti enggau pengepuh infrastruktur.-EDISI UKAS
