SINGAPURA: Opis Pemansang enggau Nyaga Tanah (LCDA) mandangka dua iti projek pemansang Sarawak iya nya Projek Pemansang Baru Bukit Assek di Sibu enggau Projek Pemansang Pasir Panjang di Kuching serimbai Sarawak Mega Fair 2025 ti diatur ba Palan Konvensyen & Pemansang Suntec, ditu, ari 16 ngagai 17 Oktober 2025.

Ba siti penerang media, Hari Lima, dua buah projek nya mandangka pengeransing LCDA nyungkak transformasyen mengeri ti meruan sereta meransang pemansang ekonomi nengeri nengah perambu pemansang strategik enggau inovatif.

“Projek Pemansang Baru Bukit Assek digaga ba kandang 815.45 ekar (330 hektar) pemesai di mengeri Sibu ti ngembuan tuju deka ngubah kandang menua nya nyadi hab mengeri moden ti ngempung pemansang komersial, genturung pendiau enggau komuniti ti sebela.

“Kelimpah ari nya, Projek Pemansang Pasir Panjang di Kuching ke sebagi ari Projek Rayat ari baruh komponen pemansang infrastruktur mungkur kandang 389.77 ekar (157.73 hektar) pemesai ti beratika pemansang dagang temuai enggau bukai," ku penerang nya.

LCDA madah, pemandang nya bela ngayanka pengawa bejuraika digital interaktif ti mandangka juluk ati organisasyen pemansang tanah sereta pengawa iya ke nyaup agenda pemansang enggau transformasyen timpuh panjai Sarawak.

Pengeransing LCDA nyereta program tu nyadi pelasar dikena ngelakuka pengulih pemansang enggau meranak puku Sarawak ngagai makit serantau enggau antarabansa, setipak enggau juluk ati Perintah Sarawak ke deka nyapai status ekonomi maju sereta bepenatai pemisi tinggi nengah Strategi Pemansang Udah COVID-19 (PCDS) 2030.-EDISI UKAS

Gambar: LCDA