Projek Pemansang Di Bintulu Dipatau Rat, Perati Mutar Isu Taba Enggau Laun

Posted on 16 Oct 2025
Source of News: ukas


BINTULU: Projek pemansang dipejalai di Bagi Menua Bintulu terus diberi perati nentuka semua inisiatif perintah nengeri nyapai tuju enggau meri pemaik ngagai rayat.

Penyanding Penemu ba Opis Premier Sarawak (Patau Projek enggau Program Menua Pesisir), Dato Sri Rohani Abdul Karim, udah ngatur pejalai matau enggau meri penerang ba Imperial Hotel Bintulu, kena Hari Tiga begulai enggau Kaban Kunsil Nengeri (ADUN) Tanjong Batu, Ts. Johnny Pang Leong Ming enggau ADUN Jepak, Iskandar Turkee.

Dato’ Sri Rohani ba sesyen penerang madah, semua agensi bejalaika projek ditangkan terus regas enggau ngena chara mutar, ukai sama besalahka pangan diri enti projek laun.

“Semangat kerejasama, randau betunga mua enggau tanggungpengawa begulai entara semua raban diperati nyadi kunchi nentuka tetiap projek tembu nitih taga sereta meri empas ngagai peranak dia,” ku iya.

Pejalai nya mega ngaul pengawa matau sekeda projek pemansang besai ba sitak Kunsil Nengeri (DUN). 

Entara projek ti diberi perati iya nya ngaga 'flyover' di Medan Jaya dalam sitak DUN Tanjong Batu, enggau tuju nambah trafik lanchar enggau pengelikun penguna jalai alun.

Di DUN Jepak, perati diberi ngagai projek ngaga parit monsun di Kampung Warisan dikena mutar penusah bah, seraya di DUN Kakus, projek nyeruri jalai premix ba sepanjai Batang Tatau ungkup akses peranak menua pesisir enggau nyukung aktiviti ekonomi dia.

Ba penerang bebida, Ts Johnny Pang madah, jematan lambung Medan Jaya diatu manggai 58 peratus sereta laun ketegal isu utiliti baka jalai kabel telekomunikasyen dalama tanah ba taba projek.

“Randau enggau Opis Kereja Raya (JKR) Sarawak enggau kontraktor udah diatur dikena nentuka kereja mindah ke kabel ulih diadu jampat lalu projek tembu nitih taga baru ti ditetap.

“Penguna jalai alun mega dilalau bejimat, kelebih agi maya malam enggau ujan, laban endur nya agi bisi projek digaga,” ku iya.

Seraya Iskandar Turkee mega madah, projek parit monsun di Kampung Warisan, Jepak beungkus RM7.3 juta udah tembu lalu mujur ngurang risiko penusah bah tunggal dia.

Perambu renggat nangkan nya mega benung ditungkap ngambi dipasuk ba rolling plan di baruh Langgur Pemansang Malaysia Lumpar Ke-12 (RMK12) nentuka ai ulih jampat agi anyut ke Batang Kemena lalu penusah bah tunggal ulih diseliah dudi hari.

Semua pengawa matau nya mandangka pengeran perintah nengeri nentuka tetiap projek pemansang, sekali ke infrastruktur jalai alun, sistem parit enggau perengkaguna mensia mayuh ulih digaga manah, efisien enggau bepuguka pengelantang rayat. 

Pejalai matau projek mega dikena meda gaya pejalai pengawa ba taba projek sereta negap pengelurus enggau akauntabiliti bejalaika projek pemansang nengeri.-EDISI UKAS