KUCHING: Pengerami Anugerah Tinta Kenyalang enggau Ngelanchar Bulan Bahasa Kebangsaan (BBK) 2025 Renggat Sarawak diatur di Balai Budaya, Dewan Bahasa enggau Pustaka (DBP) Pampang Sarawak sehari tu, nyadi pelasar ngelati jaku Melayu enggau litaricha lokal di Tanah Kenyalang.

Tuai Unit Pelajar Tinggi, MEITD, Sharifah Fariah Wan Junaidi enggau nya meri terima kasih ngagai DBP Pampang Sarawak udah ngatur pengerami ti besai reti ba pengawa nempa menua bansa enggau negap penyerakup nasional.

“Pengerami tu mandangka pengeransing, pengeliat ati enggau pengepuh ngelati jaku Melayu nyadi pugu penyerakup bansa Malaysia, lalu ngamatka juluk ba menua dikesayau tu,” ku iya lebuh bejaku ngari ke Menteri MEITD, Dato Sri Roland Sagah Wee Inn ba Pengerami Anugerah Tinta Kenyalang enggau Ngelachar Bulan Bahasa Kebangsaan (BBK) 2025 Renggat Sarawak ditu, Hari Empat.

Iya nyemetak madah ke Perintah Sarawak seruran nyukung pengawa ngelati jaku Melayu nyadi jaku kebangsaan seriris enggau juluk pemansang nengeri nuju Sarawak Maju Lantang 2030.

Ku iya, perintah nengeri udah meri agih belanja khas ngagai DBP Pampang Sarawak dikena ngatur bemacham program ngaul jaku, litaricha, pansik jaku etnik, main asal enggau ngeluar penemu anda lokal Sarawak.

“Perintah Sarawak seruran nyukung pangku pengawa DBP ti nempa enggau ngerembaika jaku sereta litaricha nasional.

“Aku pechaya ke DBP terus nyulut nyadi institusyen tin arak pengangkun rayat ke jaku Melayu,” ku iya.

Pengerami nya mega ngemata pengawa nyua  Anugerah Tinta Kenyalang ngagai bala penulis, institusi enggau sekula ti mujur ngaga karya bisi kualiti tinggi ba pengawa nulis enggau litaricha.

Bulan Bahasa Kebangsaan 2025, ku iya, ukai semina simbolik aja, tang nyadi pelasar beguna ngemau semangat rayat Sarawak ba jaku, litaricha, seni enggau pengawa nyurat Melayu.

Nya alai, iya meransang semua raban besaup nyukung pengawa DBP ngelati jaku enggau litaricha nasional.-EDISI UKAS