SRI AMAN: Perintah Sarawak terus negap pemansang rayat menua pesisir nengah bemacham inisiatif nyerangkung sosial, infrastruktur enggau pelajar.

Sapit Menteri Pelajar, Inovasyen enggau Pemansang Penau, Datuk Francis Harden Hollis madah, chara holistik nya beguna endar nentuka pengelantang rayat ba menua pesisir terus diintu meruan setipak enggau pemansang nengeri.

Iya nibar ke jaku nya lebuh bejadika Program Pemansang Komuniti Kaunsil Pelilih Sri Aman (MDSA) ditu, Hari Tiga.

Program nya diatur serimbai Kimpin Pemeresi Komuniti enggau tuju nambah penemu senentang pemesai guna pemeresi, pengelikun enggau pengerai mensia mayuh.

Ba pengawa nya, sekeda bantu belanja bela bisi disua dikena nyukung aktiviti komuniti dia nyengkaum RM5,000 ngagai JKKK Kampung Kenyungan, RM3,000 ungkup Biro Indu enggau RM2,000 ngagai Kawasan Rukun Tetangga (KRT).

Kaban Kunsil Nengeri (ADUN) Simanggang nya mega bejadika Projek Nyeruri Jalai, Parit enggau Kuasa Karan ba genturung pendiau nya, ti ngaul sekeda komponen besai nyengkaum nyeruri rumah panjai betuai ke Tr. Siliver Garit ti angus (RM200,000), ngadu ke parit (RM150,000) enggau nyeruri sistem karan (RM100,000).

Dikena negap ke agi infrastruktur pemun, perintah mega meri belanja tambah RM120,000 di baruh Program Transformasyen Menua Pesisir (RTP) dikena nyeruri jalai enggau sistem parit.

Berebak enggau nya, Datuk Francis mega bisi limpang ngabas Sekula Primari (SK) Batu Lintang, Undop serimbai ngatur Ujian Penilaian Dual Language Programme (UP-DLP) Primari 6 ungkup subjek Jaku Inggeris, Matematik enggau Sains.

Tuju pejalai nya dikena nentuka peresa ti benung diatur nya lanchar sereta nitih prosedur ti ditetapka Opis Menteri Pelajar, Inovasyen enggau Pemansang Penau Sarawak (MEITD). 

Bisi 12 chalun ngambi peresa ba sekula nya ti dibantu tiga penyaga peresa.

Pengawa ngatur peresa ba SK Batu Lintang nya lanchar enggau lantang.

“Kitai deka ke komuniti menua pesisir terus maju, beresi, likun enggau ulih besemekih, ukai semina nengah pemansang infrastruktur, tang mega nengah pelajar ti nyadi kunchi rebak biak ngulihka pengidup menyana dudi hari,” ku iya.-EDISI UKAS