SERIAN: Pengerami Hari Nembiak Mit Renggat Bagi Menua Serian Taun 2025 deka diatur enggau reti besai agi taun tu ti meri perati ngagai pengawa ngelindung, ngintu pengelantang enggau pemansang ulah nembiak mit.

Pengerami ninting taun diatur Opis Pengintu Pengelantang Mensia Mayuh (JKM) Bagi Menua Serian begulai enggau Raban Ngelindung Nembiak Mit (PPKK) Serian enggau kerejasama Sekula Primari (SK) Krangan nya ditaga ujung November tu.

Pengerami nya mega disadang dipenyadi Sapit Menteri Industri Pemakai, Komoditi enggau Pemansang Kandang Menua Sarawak, ti mega ADUN Kedup, Datuk Maclaine @ Martin Ben.

Ku Chairman PPKK Bagi Menua Serian, Melin Sunang, pengerami taun tu ukai semina program pemerindang nembiak mit aja, tang nyadi pelasar nambah pengeleda apai indai enggau komuniti pasal tanggungpengawa begulai ngelindung hak nembiak mit ari sebarang penusah kena jamah, ditempaya enggau eksploitasi.

“Kitai deka ke komuniti mereti ke tetiap nembiak mit bisi hak dilindung, disayau enggau diberi peluang mansang besai ba rampa ti likun enggau positif,” ku iya ba sesyen nyeraris program di SK Krangan kena Hari Tiga.

Pengerami nya disadang matak lebih 300 penyereta ngaul bala nembiak, pengajar, apai indai enggau peranak ari lima genturung pendiau ngelingi Krangan, iya nya Krangan Trusan, Krangan Jaya, Krangan Engkatak, Krangan Baru enggau Krangan Tekalong.

Bemacham aktiviti narit ati deka diatur nyengkaum senamrobik, lumbar ama enggau pengerami bejadi nangguh program nyadi batang program ti diatur setengah hari nya.

Program nya mega dikeandal nyadi penyungkak nempam komuniti ti siru agi ke pengawa ngintu pengelantang nembiak mit lalu narak pengeleda ke pengawa ngelindung anak nya tanggungpengawa semua raban.-EDISI UKAS