LONG LAMA: Program komuniti “Kitai Likun” diatur begulai Petronas Carigali Sdn. Bhd. (Aset Sarawak) enggau Opis Bomba enggau Penyah Penusah Malaysia (JBPM) Zon 6 Miri tembu kena Hari Tiga pengudah dua hari diatur di Dewan SJKC Kee Tee, Long Lama.
Pengawa nutup dipenyadika Kaban Kunsil Nengeri (ADUN) Telang Usan, Dato’ Dennis Ngau enggau bela datai Direktor JBPM Sarawak, Jamri Masran, Menijar Besai Kanan Petronas Carigali, Shalby Reduan, enggau pengari Pegawai Pelilih Telang Usan, Mike Arthur Nakabok.
Lebuh bejaku ba mua mayuh, Dato’ Dennis Ngau meri terima kasih ngagai JBPM enggau Petronas laban milih Telang Usan nyadi endur ngatur taun tu, sereta nerima manah perambu ngambi mayuh agi program ngaul pengelandik diatur dudi hari.
“Latih baka nyemerai ungkup raban nembiak endang patut ditampung. Mayuh nembiak kitai datai ari genturung pendiau enda nemu nyemerai laban udah teleba idup di mengeri,” ku iya.
Iya mega minta Komiti Pemansang enggau Pengelikun Genturung Pendiau (JKKK) bechunto ke Serakup Bomba Long Lama ti regas ngiga belanja kediri dikena meli injin pam ai dikena maya bisi penusah.
“JKKK enda ulih semina bepanggai ba agih belanja pengari rayat. Enti penusah angus nyadi, kita meseti jampat nyelamatka reta enggau nyawa. Ari bisi injin pam kediri, abis nadai peranak ulih ngerumban pengawa sebedau bantu datai,” ku iya nyemetak.
Seraya Shalby Reduan madah, inisiatif ninting taun nya mandangka Petronas seruran ransing negap penemu pasal pengelikun ba menua pesisir, kelebih agi senentang pengawa nagang penusah angus enggau pengelikun ba ai.
“Program tu ukai semina meri latih pemun nyelamat enggau ngerara penusah angus aja, tang mega nambah pengeleda pasal pengelikun nyadi tanggungpengawa begulai. Komuniti patut besikap napi sebarang penusah enda disadang,” ku iya.
Sekumbang dua hari program nya, bala penyereta ngulu bemacham aktiviti nyengkaum licha pengelikun, demonstrasi ngerara api, sereta latih nyelamat orang ba sungai ti diajar pegawai bomba telatih.
Kelai sukung ngagai pengawa nyaga pengelikun komuniti, sepenyampau 50 unit kereban ngerara api udah disua ngagai 10 genturung pendiau iya nya Kampung Uma Akeh, Kampung Kayan Long Lama, Long Puak, Long Banyok, Long Ikang, Long Laput, Kampung Sungai Dua, Long Urun, Logan Sibong enggau Kampung Cina Long Lama (Shoplot).
Pengawa nya dikearap ulih negap pengawa komuniti lokal besikap napi penusah angus ba menua ulu.
Program ti digulu 90 iku nyengkaum bala penyereta enggau urusetia nya mujur nyapai tuju negap penemu pengelikun, negut komuniti menua pesisir sereta ngerapit kaul entara agensi kerajaan, sektor korporat enggau komuniti menua nya.-EDISI UKAS
