SINGAPURA: Servis Perintah Sarawak majak ke pengawa nyungkak kualiti gawa ari bejalaika lebih 200 inisiatif ngena chara 'Revisit, Rethink, Recharge' (3R).
Sekretari Perintah Sarawak, Datuk Amar Mohamad Abu Bakar Marzuki madah, tuju chara nya ukai semina ngemaru sistem atur gawa perintah Sarawak aja, tang mega meri peluang ngulihka pemujur besai agi ba sektor ekonomi, pengereja pengawa enggau infrastruktur.
“Chara 3R ti dikena nya mandangka pemeras servis perintah Sarawak nelebaka diri enggau peminta sereta pemar kemaya hari,” ku iya ba jaku ngelalu rambau Nutup Program Sarawak Civil Service One Team Retreat (SCS OTR) 2025, ditu, Hari Tiga.
Berebak enggau nya, Datuk Amar Mohamad Abu Bakar mega nyemetak madah, nyadi orang gawa perintah, sida patut terus mansang ke mua lalu ukai semina bepanggai ba pemujur ti udah diulih.
Ku iya, program ti udah mujur diatur diatu patut dikerembaika agi, kelebih agi di Sarawak.
"Nyadi orang gawa perintah, kitai patut seruran nyingkang maju ke mua. Anang jampat tepantup ati enggau utai ti udah diulih kitai naka diatu. Ngemanah pengawa enggau inovasyen meseti nyadi budaya kereja.
“Servis perintah Sarawak patut jampat masai enggau ngatur mayuh agi program ti relevan enggau ubah kemaya hari. Tu beguna endar ngambi meri empas besai agi ngagai komuniti enggau nentuka pemansang Tanah Kenyalang lanchar,” ku iya nyemetak.
Ngenang senentang pengawa ngatur Program SCS OTR sekali tu, ku iya, nya mega nyadi pelasar mandangka pengulih bala tuai opis Sarawak ti sama ngesan pangku pengawa besai nyadi tuai enggau tukang sara ba randau nya.
Datuk Amar Mohamad Abu Bakar muji penau sida, sereta madah mayuh agi pengulih ti tau disidi ba bala orang gawa perintah Sarawak.
“Enti selama, kitai ngangau ke orang luar nyadi pematak randau enggau speaker. Tang sesyen kemari mandangka bala tuai opis kitai mega ulih bejalaika pengawa nya enggau nyulut, nunjukka penau nyadi tuai enggau ngatur sesyen randau sereta meri buah penemu enggau ati andal,” ku iya.
Pengawa nutup Program SCS OTR 2025 nya udah dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, disempulang tiga Sapit Premier Sarawak, Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr. Sim Kui Hian, Menteri Pemansang Indu, Nembiak Mit enggau Pengelantang Komuniti Dato Sri Fatimah Abdullah, Menteri Industri Pemakai, Komoditi enggau Pemansang Kandang Menua Dato Sri Stephen Rundi Utom, Menteri Dagang Temuai, Industri Kreatif enggau Seni Pemeridang Dato Sri Abdul Karim Rahman Hamzah, Menteri Pengangkut Dato Sri Lee Kim Shin, Menteri Pelajar, Inovasyen enggau Pemansang Penau Dato Sri Roland Sagah Wee Inn, Menteri ba Opis Premier Sarawak Dato Sri John Sikie Tayai sereta bala tuai opis bukai . -EDISI UKAS
