KUCHING: Undang-undang baru rampa menua sereta sistem Nangkap, Nguna enggau Nyimpan Karbon (CCUS) mandang pengeransing Perintah Sarawak negap pejalai dagang karbon lalu nentu pemansang Sarawak seriris enggau agenda pemeruan global.

Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, Sarawak diatu ngembuan langkar undang-undang kediri bekaul rampa menua, nyimpan karbon enggau CCUS ti nyadi pugu besai ngagai pejalai dagang di nengeri tu.

“Kitai udah bisi undang-undang rampa menua ti udah dikemanah enggau undang-undang bekaul CCUS mega udah dipejalai."

"Tu sebagi ari pugu besai ngatur dagang karbon,” ku iya madah ngagai pemberita pengudah program Road to Belem: Accelerating Climate Action in Sarawak, ditu, Hari Dua.

Datuk Patinggi Abang Zohari nerang, bisi dua langkar dagang karbon iya nya ’voluntary trading’ entara dua raban enggau dagang ti nitih atur antarabansa (compliance trading) baka ba Article 6 dalam undang-undang antarabansa.

“Ba pekara tu, kitai bekerejasama enggau Bank Dunya ngulihka formula ti betul, lebih agi ba voluntary trading,” ku iya nerang.

Iya madah, taja Sarawak bisi autonomi ba pekara tanah enggau kampung bepelasarka Konstitusyen Perintah Besai, tang nengeri tetap ngasi ke atur antarabansa ungkup rejister dagang karbon.

Bela datai, Sapit Premier Sarawak Datuk Amar Prof. Dr Sim Kui Hian, Duta Besai Brazil ke Malaysia enggau Brunei, Daniella Ortega de Menezes sereta Sekretari Mendam Opis Menteri Kuasa enggau Pemeruan Rampa Menua, Datu Abg Ahmad Abg Morni.-EDISI UKAS