KUCHING: Perintah Sarawak ngerumban pejalai pengawa Sarawak Net Zero Strategy and Carbon Plan mandangka pengeransing nengeri tu nempa pemansang meruan.
Sapit Menteri Kuasa enggau Pemeruan Rampa Menua, Datuk Dr. Hazland Abang Hipni madah, pelin nya nyadi malin ti nyaup idar Sarawak ngagai pemansng nadai karbon nengah kuasa ulih dikena baru, hidrogen, bioenergi enggau pengawa mutar bepuguka rampa menua.
“Premier kitai bisi visyen ti nyengala nengah Strategi Pemansang Pengudah COVID-19 (PCDS) 2030, iya nya dikena nempa rayat lantang, inklusif enggau meruan bepelasarka pemansang meruan enggau inovasyen.
“Nengah Sarawak Net Zero Strategy and Carbon Plan, kitai ukai semina merambu ba atas keretas aja tang ransing ngatur pengawa seriris enggau pemansang, inovasyen enggau kerejasama,” ku iya.
Iya madah munyi nya maya bejaku ba Program Road to Belem: Accelerating Climate Action in Sarawak ditu, Hari Dua.
Dulu ari nya, Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai bejadi program nya.
Sama datai, Sapit Premier Sarawak, Datuk Amar Prof. Dr. Sim Kui Hian, Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah, Menteri Pengangkut Sarawak, Dato Sri Lee Kim Shin, Sapit Menteri Dagang Temuai Sarawak, Datuk Sebastian Ting Chiew Yew, Sapit Menteri Pengangkut Sarawak (Sungai enggau Tasik) Dato Henry Harry Jinep, Duta Besai Brazil ke Malaysia, Daniella Ortega sereta temuai dipebasa ke bukai.
Berebak enggau nya, Datuk Dr. Hazland madah, pemujur Sarawak mutar ubah klimet bepanggai ba kerejasama mayuh raban nyengkaum industri, palan pansik, komuniti, nembiak enggau orang ngati kediri.
“Perintah aja enda ulih nyapai juluk Net Zero enti nadai kaul kerejasama ari semua raban.”
“Ari pengeran semua, kitai ulih ngemansangka teknologi inovatif ngena model dagang meruan sereta nyendia pengawa puang meruan ke pemaik rayat enggau rampa menua,” ku iya.
Program nya mega bisi sesyen bekunsi penemu enggau rentayan kaul entara agensi perintah, sektor industri enggau komuniti dikena negap pengawa begulai napi ubah klimet di Sarawak.-EDISI UKAS
