KUCHING: Konferen Nasional Bekaul Integriti enggau Atur (NCIG) 2025 ke diatur Perintah Sarawak enggau kerejasama Unit Ngatur enggau Pemansang Pengereja Pengawa, Opis Premier Sarawak dipadah ukai semina palan akademik, tang nalan besai dikena negap budaya atur ti ngembuan integriti ba servis perintah.

Sapit Menteri ba Opis Premier Sarawak (Integriti enggau Ombudsman), Datuk Dr. Juanda Jaya, madah konferen tu nyadi palan dikena penyereta besilih penemu, bekunsi peneleba enggau belajar ulah pemadu manah ari macham organisasyen dikena negap sistem nagang makai suap sereta nambah manah standard integriti ba dunya kereja.

“Konferen tu ukai semina awak bejuraika keretas kereja, tang mega peluang nempa rentayan strategik ngilah sektor enggau disiplin.

"Tu besai reti nentuka integriti amat nyadi budaya ba tetiap orgranisasyen,” ku iya ba program nya, ditu, Hari Dua.

Sapit Premier Sarawak Datuk Amar Awang Tengah Ali Hasan datai bejadika program nya ngari ke Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Iya nerang tiga tuju konferen nya diatur iya nya, negap penyereta nengah pengawa bekunsi ulah pemadu manah ba atur enggau pengeransing nagang makai suap, nyungkak kapasiti penyereta ngurangka penyalah makai suap lebih agi ba sektor perintah lalu nyaup Perintah Sarawak nyaga nama nengeri ari ngemeran budaya integriti.-EDISI UKAS