KUCHING: Sarawak nurai Sejarah nyadi nengeri keterubah di Malaysia ti ngembuan Ordinan Ombudsman kediri empu.
Tu nyadi takat baru ba pengawa negap integriti enggau atur nentuka atur ti lurus, akauntabiliti sereta bepelasarka rayat.
Pekara nya dibantai serimbai Konferen Nasional Bekaul Integriti enggau Atur (NCIG) 2025 ditu, Hari Dua.
Premier Sarawak, Datuk Patinggi Tan Sri Abang Abdul Rahman Zohari Tun Datuk Abang Openg madah, undang-undang Ombudsman nya siti pengawa berani dikena negap sistem ngemata enggau akauntabiliti administrasyen nengeri ari nyendia mekanisme ungkup rayat mantai sebana, nagih pengelurus enggau nentuka perintah sedia diperesa enggau ngemanah servis.
“Sarawak mega narak integriti nengah macham inisiatif baka numbuh Unit Integriti enggau Ombudsman Sarawak (UNIONS), nyiri Pegawai Integriti Berejister (CeIO) ba tetiap agensi perintah, bejalaika sistem ‘e-perolehan’ enggau latih ti berurun ungkup orang gawa perintah.
“Inisiatif tu ngayanka integriti ukai semina rambai jaku aja tang nyadi pelasar ngagai administrasyen enggau pejalai pengawa pemansang,” ku iya.
Iya madah munyi nya nengah teks jaku dibacha Sapit Premier Sarawak, Datuk Amar Awang Tengah Ali Hasan lebuh bejadi konferen nya.
Konferen ngena rambai jaku “Reimagining Governance for People, Planet and Profit” nya ngempuru lebih 1,000 penyereta ari sektor perintah, peribit enggau sivil, mandangka agenda integriti beguna ba global.
Ba sukut Strategi Pemansang Udah COVID-19 (PCDS) 2030 ku iya, atur perintah nengeri beratika pemansang infrastruktur, digitalisasyen enggau ekonomi gadung enda mujur enti nadai pengelurus, akauntabiliti enggau integriti.
Ku iya, konferens nya bela ngayanka pengeransing Sarawak seriris enggau Tuju Pemansang Meruan (SDG 16) ti meri perati ba pekara pengelikun, pengelurus enggau institusyen ti tegap.
Integriti dipeda ukai semina bekaul enggau ripih administrasyen tang meri empas terus ngagai pengelantang rayat, ku iya madah baru.
“Integriti mai reti nentuka nembiak ba menua pesisir belajar ba sekula ti likun, orang sakit seranta diperubat enggau asi sereta dagang mit bulih peluang belanja sebela.
"Tu mih reti ke bendar integriti lebuh disalin ngagai pengidup besehari-sehari rayat,” ku iya.
Ku iya nerang, Sarawak mega chakah ba agenda global nengah pejalai inisiatif kuasa ulih dikena baru, pemansang hidrogen gadung enggau pengawa ngintu kampung tropika, ti ukai semina nyaup Sempekat Paris bekaul ubah klimet tang mega mandangka pengepuh nengeri nempa pemansang gadung enggau meruan.
Konferen NCIG 2025 diatur Association of Development Finance Institutions of Malaysia (ADFIM) enggau kerejasama Perintah Sarawak, nyadi nalan besai dikena negap rentayan kerejasama entara sektor perintah, peribit, institusyen pekara wang, kaunsil ukai dikuasa perintah (NGO) enggau rayat sivil dikena nempa integriti nyadi strategi lalu atur nyadi budaya ba pemansang menua.
Bela datai, Sapit Menteri ba Opis Premier Sarawak (Integriti enggau Ombudsman) Datuk Dr Juanda Jaya, Sapit Menteri Dagang Temuai, Industri Kreatif enggau Seni Pemerindang Sarawak, Datuk Sebastian Ting Chew Yew, Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu, Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat, Sapit Menteri Utiliti enggau Telekomunikasyen (Telekomunikasyen), Datuk Liwan Lagang sereta Sapit Sekretari Perintah Sarawak (Operasyen), Datu Hii Chang Kee. - EDISI UKAS
