KUCHING: Semua atlit enda ngira nengeri ti bulih midul ba pekit Lumba Orang Bengal Malaysia (SOPMA) XXII nerima insentif ari Perintah Sarawak.

Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah madah, insentif disetuju Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke alai pemenang midul emas nerima insentif RM5,000.

Lalu pemenang midul pirak nerima insentif RM2,000 enggau pemenang engkeraju nerima RM1,000.

"Tu siti sejarah ba pekit, lalu siti manifestasi inklusiviti ti ngilah Tasik China Selatan sereta kandang menua bukai.

"Pekara tu mandangka penyiru siku tuai benama Abang Jo, siku ti andal nengah sukung ulih ngempung rayat ngilah entara kandang menua sereta ngilah Tasik China Selatan," ku iya.

Iya madah munyi nya maya bejaku ba Pengerami Nutup Pekit SOPMA XXII Sarawak 2025 ba siti hotel tebilang ditu, Hari Satu tu tadi.

Nambah ke jaku iya, Dato Sri Fatimah madah, pengawa Perintah Sarawak tu mandangka inklusiviti ukai semina rambai jaku aja tang siti pengawa ti nyata.

Ku iya nerang, tu mih kelai penyiru sereta basa Premier Sarawak ngagai semua komuniti bengal.

Penyampau kesemua insentif ti diberi ngagai atlit ba SOPMA XXII Sarawak 2025 manggai RM400,000.

Sabah nyadi penerima insentif pemadu mayuh enggau penyampau kesemua RM119,000, ditangkan Sarawak ti nyadi tuai rumah, RM60,000 enggau Wilayah Persekutuan sepenyampau RM57,000.

Kelimpah ari nya, Perlis nerima insentif penyampau RM32,000, Johor nerima RM29,000 enggau Kedah bulih RM22,000, ditangkan Pulau Pinang nerima insentif penyampau RM19,000 lalu Melaka RM15,000.

Perak, mai pulai RM12,000, Selangor bulih insentif sepenyampau RM10,000, Pahang RM9,000, Kelantan enggau Terengganu bela bulih RM7,000 enggau Terengganu lalu Negeri Sembilan nerima RM3,000. -EDISI UKAS