BAU: Projek nangkir jalai Sebuku ari Indu Opis Polis Pelilih Bau nyentuk Jematan Tondong dipelaba beungkus RM40 juta deka dipejalai dikena nambah pengelantang enggau pengelikun penguna betengah ke jalai nya.

Sapit Menteri Pengangkut (Sungai enggau Tasik) Sarawak ti mega Kaban Kunsil Nengeri (ADUN) Tasik Biru, Dato Henry Harry Jinep, madah, kenyau pengawa ngaga jematan Tondong, jalai Sebuku nyadi batang jalai ditengah peranak menua nuju ke Kuching enggau Pasar Bau.

Taja pia, jalai ti bisi diatu, ku iya, nyau majak sekut lalu enda likun ketegal perengka pengangkut betambah.

“Jalai ti besai agi patut digaga ngambi enda mudah ampuh bah, enda napi penyekut lebih agi maya nembiak Sekula Sekondari (SMK) Bau pulai ari sekula, enggau mega ngambi kandang menua Sebuku enda tinggal arus pemansang.

“Tu perambu kitai lalu dipelaba belanja dikena manggai RM40 juta laban ungkus ke majak niki, lalu tu mega begunaka timpuh ngaga,” ku iya.

Iya madah munyi nya maya bejadika Pengerami Kuih Bulan ti diatur Komiti Pemansang enggau Pengelikun Genturung Pendiau (JKKK) Kandang Menua Sebuku di Balai Sekula Primari Bansa (SJK) Chung Hua Sebuku, ditu, Hari Minggu tu tadi.

Dato Henry mega madah, seraya nganti projek nya dipejalai, iya deka ngena belanja ti udah bisi dikena nyeruri jalai ba kandang menua nya.

Lalu ungkup melakin jalai ke rumah peranak menua, pekara nya deka dibai ngagai Kaunsil Pelilih Bau ngambi ngatur pengawa nangkan nya.

Kelimpah ari nya, pengawa ngaga balai baru ungkup guna rayat ba kandang menua Sebuku enggau Taiton bela diberi perati.

Nitih ku iya, projek ngaga jalai baru ba kandang menua Taiton benung chakah dipejalai ngambi bekal ai beresi enggau kuasa karan ulih disambung sereta ngemuntang pengawa ngaga balai nya.

Berebak enggau nya, iya ngelalau peranak menua Sebuku ngambi nyendia taba ti engkeman alai ngentak balai lalu enda mantah projek nyeruri jalai Sebuku enti udah dikemendarka perintah ila.-EDISI UKAS