KUCHING: Pekit Lumba Orang Bengal Malaysia (SOPMA) XXII diatur di Sarawak taun tu mandangka pengeransing perintah nengeri negap komuniti orang bengal nengah agenda lumba ti inklusif.
Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madah, SOPMA ukai semina kelang ngulih ke midul aja, tang mega kelai semangat inklusiviti enggau segulai sejalai, seriris enggau Juluk Pemansang Meruan (SDG) sereta Strategi Pemansang Udah COVID-19 (PCDS) 2030 ti ngemerat pemansang ti lurus sereta sebela ungkup semua.
“Individu begunaka bantu khas, nyengkaum sida ti bengal, mega ngembuan pengerindu sereta penau ba bidang lumba enggau main.
“Polisi inklusiviti begunaka kitai nyendiaka peluang enggau pelasar dikena sida belumba, bepekit sereta mandangka pengulih ti dikembuan," ku iya.
Iya madah munyi maya ba jaku pengelalu ba Program Bejadi SOPMA XXII Sarawak 2025 ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Hikmah Exchange Event Centre, ditu, Hari Empat tu tadi.
Iya mega madah ke diri temegah ati meda penyulut atlit bengal Sarawak ti udah mujur mai nama menua ba renggat antarabansa, nyengkaum tiga atlit ti deka bepekit ba 25th Summer Deaflympics di Tokyo, Jepun November tu.
Ku iya, inisiatif inklusif bukai baka meri kelala jaku isyarat ba prasekula SeDidik sereta pengawa ngatur Malaysia Deaf Summit ngayanka tanggungpengawa Sarawak berati ke agenda inkulisiviti di renggat nasional enggau antarabansa.
Pekit SOPMA XXII Sarawak diatur berengkah ari 2 ngagai 6 Oktober lalu achara diatur ba kelang pekit ngelingi Kuching enggau Samarahan.
Bisi lima bansa lumba enggau main dipekit baka olahraga, badminton, futsal, tenpin bowling, enggau orienteering.
Pekit sekali tu mandangka 14 kontinjen ngambi bagi ti ngaul 610 atlit, 167 pegawai sereta 100 voluntia ti deka ngerichahka SOPMA Sarawak.
Sama datai ba program nya Menteri Pengangkut Sarawak Dato Sri Lee Kim Shin, Sapit Menteri Pemansang Indu, Nembiak Mit enggau Pengelantang Komuniti Sarawak (Pengelantang Komuniti) Datuk Mohammad Razi Sitam, Presiden Gerempung Lumba Orang Bengal Malaysia (Dr.) Ong Shin Ruenn sereta temuai dipebasa ke bukai.-EDISI UKAS
