KUCHING: Dua band rock lagenda menua, Search enggau XPDC deka ngerichah Stadium Sarawak ba 13 Disember tu nengah Konsert Fenomena Samurai.

Rintai XPDC iya nya Izo, Lola, Eddie, Arif enggau Mamu, lalu nyangka bisi kaban ‘otai’ bela merindang.

Lalu Search nerang ke Din enggau Kid disaup vokalis baru Pasha sereta siku ex- vokalis lama ke deka dipadah malam nya ila.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, kededua band tu ila udah tentu narit perati peminat muzik rock menua, nyengkaum ari menua bukai baka Indonesia, Brunei Darussalam enggau Singapura.

Nitih ku iya, opis menteri iya deka terus meri sukung ngatur program besai reti tu dikena ngangkat industri muzik menua, kelimpah nyendia pemerindang ngagai rayat lebih agi bala peminat.

“Iya ke besai reti agi, program tu diperambu ulih mujur laban iya ukai semina ulih mai pengaga ati ngagai rayat tang mega meri semangat enggau awak ngagai sida bebendar nyagu seni pemerindang nyengkaum penanyi, raban muzik sekali ke udah lama tauka baru bela deka diberi peluang.

“Opis Menteri enggau Perintah Sarawak seruran meri sukung laban aku empu nemu pemedis pejalai sida ba bidang seni pemerindang tu, lebih agi penanyi enggau pemerindang ti semampai datai ba program baka tu,” ku iya ba aum media Konsert Fenomena Samurai, ditu, Hari Tiga.

Rega tiket ‘early bird’ Konsert Fenomena Samurai udah dibuka nitih kategori iya nya RM250 (VIP), RM188 (Mosh), RM104 (Free Standing), RM160 (Silver) enggau RM90 (Bronze) ke ulih dibeli nengah website http://fenomenasamurai.ubertickets.asia/.

Lalu rega baka selama, RM359 (VIP), RM269 (Mosh), RM149 (Free Standing), RM229 (Silver) enggau RM129 (Bronze) ke ulih dibeli nyentuk maya konsert kena 13 Disember tu. -EDISI UKAS