DEBAK: Pemansang di sitak Parlimen Betong diatu nguing ngagai pekara pelajar enggau pemansang sosioekonomi pengudah sekeda perengkaguna pemun mujur digaga ba sitak nya.
Kaban Parlimen Betong, Dato Dr Richard Rapu madah, rurun pemansang nangkan tu deka berati ke pengawa nempa rayat menua pesisir ti bepenemu, bepengelandik sereta landik digital ngambi enda tinggal ba arus pemansang nengeri enggau menua.
“Kitai di Sarawak chukup betuah laban ngembuan Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg lalu di Betong, kitai bisi Sapit Premier Sarawak, Datuk Amar Douglas Uggah Embas ti landik merambu sereta nyungkak penatai pemisi nengeri,” ku iya lebuh bejadi Program ‘Sinergi KEMAS: Santunan Desa KEMAS 2025 (Program Desa Cerdas)’ di Rumah Chendang Guang, Penunus, ditu, empai lama.
Nitih ku iya, pengulih nambah asil nengeri nentuka bemacham inisiatif ulih dipejalai nengah Strategi Pemansang Udah COVID-19 Sarawak (PCDS 2030) nempa Sarawak nyadi kandang menua bepenatai pemisi tinggi.
Dato Dr Richard bela nerang ke program bantu sosioekonomi baka Bantu Barang Diguna Sarawak (SKAS) ti dipejalai taun tu ngenap inisiatif Perintah Besai baka Pemeri Tunai Rahmah (STR) enggau SARA.
Iya mega madah, ba pekara pemansang sitak, tanggungpengawa Agensi Pemansang Bagi Menua Betong (BDDA) diatu nyadi ‘game changer’ ngambi merambu enggau bejalai macham program pemansang nitih pekara diguna rayat renggat baruh.
Ba sukut pemansang modal mensia, iya muji inisiatif Opis Pemansang Komuniti (KEMAS) nyadi agensi di baruh iring Opis Menteri Pemansang Genturung Pendiau enggau Kandang Menua (KKDW) ti ransing negap pelajar tumu nembiak mit nengah 42 TASKA enggau TABIKA di sitak Parlimen Betong.
Nitih ku iya, pengelebih ari KEMAS iya nya Program Landik Macha enggau Nulis Orang Besai Tuai (LEADS) dikena mantu raban orang besai tuai landik macha enggau nulis.
“Aku dipadahka program tu benung dipejalai di Penunus.
“Program baka tu ulih dikerembai ngagai pelajar landik digital, pengelandik ti dipeda nyadi perengka ti diguna seriris enggau jeman ekonomi digital kemaya hari tu,” ku iya.
Ba pengawa nya, iya bela ngemendar agih belanja penyampau RM5,000 ngagai Gerempung Rumah Penunus dikena nyaup ngatur aktiviti enggau pekara diguna sida.
Berebak enggau nya, Pegawai KEMAS Bagi Menua Betong Jefry Lana madah, Penunus palan keempat ba siri bejalai Program Sinergi KEMAS: Santunan Desa KEMAS 2025 di sitak Parlimen Betong.
“Sebedau tu, program udah diatur di Kampung Supa (DUN Saribas), Dewan Tan Sri Alfred Jabu, SMK St Augustine (DUN Layar) enggau Balai Komuniti Spaoh (DUN Bukit Saban),” ku iya.
Iya madah, entara program diatur nyengkaum licha interaktif ari Opis Bomba enggau Penyah Penusah Malaysia, Opis Pengintu Pengelantang Mensia Mayuh enggau Opis Pengerai Bagi Menua Betong.-EDISI UKAS
