KUCHING: Bintulu deka nyadi tuai rumah Ngintu Minggu Nembiak Sarawak 2025 ti deka diatur ari 13 ngagai 19 Oktober tu, enggau bemacham program ngerindu ati nganti lebih 5,000 iku ari selampur nengeri.

Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah madah, program diatur ninting taun nengah chara begintir di selampur nengeri, lalu taun tu Bintulu pengudah Kapit enggau Mukah ba edisyen ti dulu.

“Pengawa ngatur Minggu Nembiak tu sebagi ari pengeransing perintah ngaku sereta negap raban nembiak, kelimpah nyendia nalan mandangka penau ba lumba, rekreasyen, seni sereta dagang,” ku iya ba aum media ditu, Hari Satu tu tadi.

Berambai ke jaku ‘Belia Aspirasi Kita’, program tu bela ngemerat tanggungpengawa nembiak ti dikearap menua, agen ngubah sereta nyungkak pemansang nengeri.

Program ti diatur pengelama seminggu tu deka dipejalai nengah tiga komponen besai baka Youth Champion, Youth Active enggau Youth Marketplace ti mandangka macham aktiviti baka woksyop tinju begulai enggau Sapok Biki, sesyen pengerai runding, expo nembaik, marathon Youth Fest Run, pengawa bejual produk dagang sereta pekit Youth Got Talent.

Batang program deka diatur ba 19 Oktober di Dewan Suarah Bintulu ti disadang dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Entara program ti disedia iya nya Anugerah Nembiak Sarawak kelai masa nembiak lelaki, indu sereta gerempung nembiak nyulut enggau perais mata duit nyentuk RM10,000.

Kelimpah ari nya, panggau pemerindang deka richah enggau artis lokal baka Daniel Leong, Lucy M, Nurul Zahnesha, Alexander Peter, Tuah Jili, JC Pangganiban sereta raban penanyi dikangau khas One Avenue Band.

“Perintah semampai meri terima kasih ke saup sereta tanggungpengawa ti udah dipejalai nembiak ba pemansang nengeri enggau menua.

"Program tu kelai pengeransing perintah deka terus ngaul sereta negap raban biak,” ku iya.-EDISI UKAS