DALAT: Apai indai pengajar mih irang keterubah nempa pemanah ulah, emosyen sereta kognitif nembiak mit.

Nya kebuah, Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah, nyemetak madah ke apai indai patut nambah penemu bekaul nyadi apai indai ti pemadu baru lalu ukai semina bepanggai enggau chara lama.

“Meranak puku ba pengepuh ngajar nembiak mit sigi pengawa meranak puku timpuh panjai ti nguntungka sida empu,” ku iya.

Iya madah munyi nya maya bejaku ba ’Kursus Ilmu Keluarga: Modul Belaian Kasih (Keibubapaan Anak Kecil) Siri 2/2025’ ti diatur di Kompleks Kebajikan Dalat, Hari Satu tu tadi.

Kus tu belabuh diatur ba taun 2024 di Kuching ti mujur dipasuk 83 penyereta lalu ba pun 2025, kus tu ditandu di Kapit enggau 74 penyereta enggau diatu diatur di Dalat enggau selinting dipasuk 80 penyereta.

Kaban Kunsil Nengeri (ADUN) Dalat nya bela ngarap ngambi raban penyereta ngena penemu ti dikembuan diri sereta bekunsi pemanah kus ngagai komuniti sida dikena nempa Ruang Bilik Meruan.

Ba pengawa nya mega, bisi tujuh nembiak udah nerima ensikal nyadi inisiatif ngelempung tating ruang bilik lalu nyaup nyendia kereban sekula ti diguna sida.

Bela datai, pengari Direktor Opis Pemansang Indu enggau Ruang Bilik Sarawak Un Siew Yien, Pegawai Pelilih Dalat Mathew Hubert enggau Pengelicha ari Kaunsil Peranak Menua enggau Pemansang Ruang Bilik Menua (LPPKN) Sarawak Fiona Maurice. -EDISI UKAS