KUCHING: Urung 7,407 raban unit uniform nyengkaum Opis Bomba enggau Penyah Penusah Malaysia (JBPM), Polis DiRaja Malaysia (PDRM), Raban Penyangga Orang Periman Malaysia (APM), Unit Pengelikun enggau Penerit Adat Sarawak (UKPS) nyengkaum Opis Pengerai Nengeri Sarawak (JKNS) deka digerah besikap napi musin landas (MTL).

Sapit Premier Sarawak, Datuk Amar Douglas Uggah Embas madah, MTL sekali tu disadang nyadi ba bulan November nyentuk March taun baru ke alai semua ti bekaul udah sedia nyengkaum raban enggau kereban ti diguna enti sema penusah ngenyit nyadi.

“Aku dipadah ari sukut raban, semua udah sedia ngaul semua agensi baka ti disebut aku tadi iya nya bisi 7,407 iku."

“Kelimpah ari nya, kereban darat bisi 3,637 unit, nyengkaum perengka pengangkut enggau kereban ti bekaul lalu kereban ba ai kitai ke disedia bisi 8,619 unit sereta kereban langit bisi 14 unit, nyerangkung helikopter enggau dron,” ku iya.

Iya madah munyi nya ba aum media pengudah ngulu aum Komiti Ngatur Penusah Ngenyit Nengeri Sarawak (JPBNS), ditu, Hari Satu tu tadi.

Datuk Amar Douglas ti mega Chairman JPBNS madah, penyampau raban ti deka dianjung gawa nyengkaum 22,428 iku volunteer ti deka sedia nyaup napi MTL.

Berebak enggau nya, iya nyemetak madah ke UKPS mega deka dianjung ngambi nyempulang operasyen di menua, nyengkaum numbuh Tim Mutar Penusah Ngenyit Komuniti dikena ngemata pekara ti nyadi di sitak ke mar dilawa raban unit uniform.

“Sida tu komiti rayat menua ti udah diajar mutar enti sema penusah ngenyit nyadi ba genturung pendiau tauka rumah panjai nentuka nadai nyawa bebadi enggau reta tengkira ulih dipindah ngagai endur ti likun enggau lengkas.

“Raban tu dilatih nengah chara berenggat laban sekeda genturung pendiau enggau rumah panjai kitai di Sarawak chukup jauh,” ku iya.

Pengawa berumban besikap tu dipejalai pengudah belajar ari penusah ti nyadi di Bintulu enggau Miri taun tu.

Nitih ke penerang, sepenyampau 658 palan ngenduh udah ditetapka lalu perengka udah dipadah meseti diperesa sereta dikemaha ngambi seruran sedia dikena maya beguna.

Berebak enggau nya, Opis Pengintu Pengelantang Mensia Mayuh di baruh Menteri Pemansang Indu, Nembiak Mit enggau Pengelantang Komuniti Sarawak Dato Sri Fatimah Abdullah deka nyendia bantu, nyengkaum pek pemakai, sereta numbuh 28 nalan alai nyimpan bekal.

Opis Kereja Raya, Opis Entali Ai enggau Parit (DID) enggau opis bekuasa menua bela diasuh meresa gaya jalai, bukit enggau kandang mengeri ngambi ngurangka penusah tanah tusur tauka ampuh bah.

Sama datai ba aum media nya, Dato Sri Fatimah, Sapit Sekretari Perintah Sarawak (Administrasyen) ti mega Sapit Chairman JPBNS Datu Buckland Bangik enggau Direktor UKPS Abdul Wahab Rahim. -EDISI UKAS