KUCHING: Festival Filem Antarabansa ASEAN (AIFFA) 2025 ti deka diatur kena 13 ngagai 15 November tu nurai sejarah baru pengudah nerima lebih 200 penyereta filem, penyampau pemadu mayuh kenyau ari dipejalai ba taun 2013.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, AIFFA udah ngerembai nyadi siti festival filem betikas tinggi rantau ASEAN lalu diatu diaku nyadi nalan besai endur pengemeran industri kreatif betemu.

“Lebuh nyebut pasal AIFFA tauka festival filem tu, kitai deka meda nya nyadi pelasar dikena nerenak enggau ngerembaika penau ba industri filem," ku iya ba aum media, ditu, Hari Satu tu tadi.

Iya mega madah pemujur tu kelai Sarawak majak dikelala nyadi palan besai industri kreatif global seriris enggau pemansang deras ekonomi kreatif dunya ti diatu nyadi sektor bisi pengulih.

Atur pengawa sekali tu mantaika Borneo Documentary Awards ti deka ngangkat karya dokumentari betikas antarabansa sereta ASEAN UniFest ti meri peluang nembiak universiti ngasilka filem pandak bepuguka Pelin Pemansang Meruan (SDGs).

AIFFA 2025 bela ngayan selebriti prolifik Hong Kong, Simon Yam ti deka datai ke Kuching ba sesyen betemu enggau peminat di Kuching Waterfront semak Godown Amphitheatre.

Malam Gala deka richah enggau pemerindang ari penanyi tebilang Indonesia, Ruth Sahanaya enggau legenda muzik Malaysia, Dato’ M. Nasir.

Lebih 300 pengemeran filem, pelakun enggau kru dipelaba begelumu di Kuching sepemanjai festival ti mega ngena palan baru baka The Spring enggau Borneo Cultures Museum ngambi ngemuntang akses mensia mayuh ngambi bagi.

AIFFA ti ditumbuh 12 taun ari buah runding Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg diatu majak ngerembai nyadi program tebilang rantau ASEAN lalu engkeman endar enggau penuduk Malaysia ti nyadi Chairman ASEAN 2025.-EDISI UKAS