DARO: Pengerami Pulau Bruit 2025 sekali agi ngayanka pengulih nyadi penyungkak ekonomi lokal pengudah asil bejual sepanjai lima hari manggai RM200,000.

Penyampau nya bukti nyata produk lokal ulih besemekih enggau laku kelebih agi asil tasik enggau betanam betupi.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol meri terima kasih ngagai semua raban ti ngambi bagi seraya nyemetak madah ke pengerami nya meri empas besai ngagai sosioekonomi komuniti lokal.

Ku iya, pengawa ngatur pengerami tu ukai semina meri peluang ngagai pedagang mit enggau jelan pemesai ngelaku produk sida tang mega nyadi pelasar nyagu identiti Pulau Bruit nyadi palan ti kaya enggau asil tasik sereta betanam betupi.

Ku iya, pemaik ekonomi ari pengerami tu mega diasai ke komuniti pengudah peluang gawa sementara disedia lalu meransang interaksyen sosial ti rat agi ba komuniti.

Iya madah munyi nya lebuh bejadi pengawa nangguh Pengerami Pulau Bruit 2025, kena Hari Minggu.

Bela datai, Kaban Parlimen Tanjung Manis, Yusuf Abdul Wahab ti ngemeratka pejalai Program Budi MADANI ari perintah besai nyadi entara inisiatif beguna nyaga pengelantang rayat.

Sepanjai dua hari tumu atur pengawa, pengerami nya udah ngerikod untung urung RM100,000 asil ari 95 bansa ti nyual bemacham produk baka Mini Agrofest, Komuniti Semop, Gerai Usahawan sereta Pasar Tani Daro.

Edisyen sekali tu ngempuru semua 14 pengentap ba Pulau Bruit nengah mayuh aktiviti baka lumba, main asal, sukaneka enggau aktiviti rekreasyen seraya negap penyerakup sereta kerejasama komuniti.

Pengawa nya mega richah nengah pengawa nyuaka perais pekit, chabut tikit benasip 100 iti sereta pemerindang main asal ti ninggalka kenang manis ngagai bala pengusung enggau peranak lokal.

Pegawai Pelilih Daro, Zul Usup enggau Pemancha Pelilih Daro, Bujang Razeli mega bisi datai. -EDISI UKAS