KUCHING: Sepenyampau RM43 juta udah diagih nengah Program Greater Kuching Coordinated Development Agency (GKCDA) dikena ngaga rentayan jalai baru ari Kampung Mentung Mara-u ngagai Kampung Mayang Kawan enggau Pulau Piranuk.

Sapit Menteri Industri Pemakai, Komoditi enggau Pemansang Kandang Menua Sarawak ti mega Kaban Kunsil Nengeri (ADUN) Kedup Datuk Martin Ben madah, jalai bansa R1 nya disadang ngemandak timpuh pejalai entara genturung pendiau nya.

“Nya kebuah, pekara tu dikearap ulih nyendia mayuh agi peluang dikena berimbaka tanah baru sereta aktiviti utai tanam komersial,” ku iya lebuh Pengerami Tuai Begulai Enggau Rayat sereta Pengawa Nyuaka Surat Chiri Tuai Raban Bansa sereta Setipikit AJKKK Kampung Pulau Piranuk kena Hari Enam.

Nambah ke nya, Datuk Martin ngelalau Tuai Raban Bansa enggau Tuai Komuniti (KMKK), raban Komiti Pemansang enggau Pengelikun Genturung Pendiau (JKKK) meseti bejalaika tanggungpengawa sida nentuka semua perambu pemansang infrastruktur ulih lanchar enggau ngasi agi dipejalai.

Ku iya agi, kerejasama rat entara tuai komuniti, pengari rayat enggau tuai opis perintah beguna endar dikena ngemujur peminta enggau bejalaika genap projek pemansang.

Ba pengerami nya, iya mega ngemendar agih belanja khas penyampau RM20,000 ngagai JKKK Kampung Pulau Piranuk dikena nyukung pengawa ngatur aktiviti ngaul komuniti enggau pemansang genturung pendiau. -EDISI UKAS