KUCHING: Atlit biak Recurve Sarawak, Cecil Nathanael Busu Polycap nurai sejarah ba Borneo Games Kuching (BGK) 2025 pengudah bulih tiga midul emas ba achara Recurve seraya ngangkat nama Sarawak ba panggau serantau.

Pemujur Cecil nunjukka disiplin sereta pengeransing belatih pengelama berapa bulan udah mansutka asil.

“Aku chukup gaga laban ulih nempa pemujur,” ku iya lebuh dirandau pemberita Unit Komunikasi Awam Sarawak (UKAS), kena Hari Minggu.

Ba baruh panchar mata panas di lapang sasar, tiap panah laja Cecil enda kala tekuing ke bukai lalu tu nunjukka pemintar iya nyelinting.

Cecil ngempu Recurve Men Individual, Recurve Men Team enggau Recurve Mixed Team ngujungka iya entara atlit archery pemadu manah sepanjai lumba tu.

Lebih manis, penyulut nya mega ngangkatka iya ba rintai Top 5 Medalist Men BGK 2025.

Cecil ngarapka penyulut tu ulih diterus ba lumba bukai ngambi terus ngemegah nama Sarawak ba panggau lumba.

Penyulut iya ba BGK 2025 mega dikearap ulih meri peransang ngagai rebak biak ngaul diri ba lumba archery seraya nempa mayuh agi penau baru ti bisi pengulih nyagu nama Sarawak enggau Malaysia ba tikas dunya. –EDISI UKAS