MIRI: Pengawa ngatur Sarawak AeroBig Day 2025 di Miri City Hall kena Hari Minggu mujur nyadi pelasar ngempung rayat pupu bansa nengah aktiviti belepa.

Lebih 700 penyereta ngulu program nya seraya nunjukka penyereta nambah dibanding taun nyin tadi lalu tu mega ngayanka sukung majak nambah ngagai inisiatif gaya idup bepengerai.

Menteri Pengangkut Sarawak, Dato Sri Lee Kim Shin madah, pengawa tu diatur ukai semina narak budaya bepengerai ngagai rayat tang mega ngerapit kaul penyerakup enggau pengelantang pupu bansa di nengeri tu.

“Pengawa baka tu beguna endar laban ukai semina aktiviti belepa tang mega meransang semangat begulai lalu ngingatka kitai senentang pengerai nya reta pemadu berega ba pengidup,” ku iya lebuh bejadi program nya.

Dato Sri Lee mega muji raban pengatur enggau volunteer nentuka pengawa nya lanchar lalu nyemetak madah ke perintah nengeri semampai nyukung pengawa nempa komuniti regas, lantang enggau besemekih.

“Pengerai tubuh enggau pengelantang runding bela beguna dikena napi pemar ba pengidup besehari-sehari.

“Nengah pemisi aktiviti baka tu, mensia mayuh ukai semina gerai agi tang mega seati,” terang iya.

Sama datai iya nya Datuk Bandar Bandaraya Miri ti mega ADUN Pujut Adam Yii Siew Sang enggau Chairman Pengatur Sarawak AeroBig Day 2025 Ryan Jee Kouk Hiong.-EDISI UKAS

#UKASnews