MIRI: Bemacham pekara bekaul adat bumiputera Sarawak nyengkaum Adat Iban 1993, Adat Bidayuh 1994, Adat Kayan-Kenyah 1994, Adat Bisaya 2004, Adat Penan 2011 sereta adat Melanau ba Seminar Adat Zon Utara 2025 ditu, kena Hari Lima.

Seminar diatur Majlis Adat Istiadat Sarawak (MAIS) pengelama dua hari nya meri perati ngagai sukut ngatur tanah adat bemalinka Land Code (Amendment) 2018 kelimpah bejalaika konsep pemansang adat natif Sarawak.

Program nya mai mensia mayuh mereti ke pangku pengawa MAIS seraya ngemerat adat ti relevan ba pengidup moden kelebih agi napi bemacham pemar kemaya hari.

Pengerami nutup udah dipenyadi Menteri ba Opis Premier Sarawak, Dato Sri John Sikie Tayai enggau penatai beratus penyereta nyengkaum tuai komuniti, agensi perintah enggau pengari komuniti lokal.

Sama datai iya nya Sapit Menteri ba Opis Premier (Undang-Undang dan Adat Bumiputera), Datuk Jefferson Jamit Unyat, Sapit Menteri di Opis Premier (Pengereja Pengawa, Imigresyen enggau Patau Projek), Datuk Gerawat Gala, Kaban Kunsil Nengeri (ADUN) Telang Usan, Dato Dennis Ngau, Tuai MAIS, Datu Ronnie Edward, Sekretari MAIS, Mackos Sibong sereta Pegawai Pelilih Miri, Siti Rohanie Yusof ti ngari ke Residen Bagi Menua Miri.-EDISI UKAS