KUCHING: Raptai penuh Pengerami Nutup Borneo Games Kuching (BGK) 2025 ti diatur di Penview Convention Center (PCC) Demak kena Hari Lima lanchar seraya nyadi penyikap kepenudi sebedau pengerami nutup kena Hari Minggu tu.

Raptai nya dikemata Sapit Menteri Nembiak, Lumba enggau Pemansang Orang Dagang Sarawak, Dato Gerald Rentap Jabu ngaul simulasyen penuh atur pengerami nyengkaum penatai temuai dipebasa, belagu lagu Negaraku enggau Ibu Pertiwiku, pemerindang ngelalu penatai sereta besampi.

Nambah ke nya, tim teknikal, atur pengawa, hos enggau raban mantai pemerindang mega meri perati ngagai sukut nyeraris kepenudi nentuka pengerami nutup lanchar.

Raptai nya mega meri perati ngagai pengawa nyuaka anugerah atlit pemadu manah lelaki enggau indu, mandang video khas sereta pemerindang ti deka nyadi pematak malam pengerami nya ila.

BGK 2025 ti diatur di Kuching kenyau ari 24 September tu tadi ukai semina nyadi nalan atlit bepadan tang mega nyadi pelasar mekuh kaul serantau bepelasarka semangat belumba.

Pengerami nutup deka diatur Hari Minggu tu belabuh ari pukul 8 malam lalu deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Sama datai ba raptai iya nya Direktor Unit Protokol, Istiadat enggau Atur Pengawa Sarawak, Datu Hamdan Sharbini. –EDISI UKAS