DARO: Pengerami Pulau Bruit 2025 nyadi pelasar beguna nyungkak ekonomi komuniti tebing tasik seraya nyagu Pulau Bruit nyadi palan dagang temuai di Sarawak.

Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, pengerami nya bisi penyelai kediri empu ti ngayanka asil tasik enggau utai tanam seraya ngangkatka penyelai Pulau Bruit ngagai pengusung luar.

“Pengerami tu bisi penyelai kediri empu lalu bisi pengulih dibantai ngagai komuniti luar,” ku iya lebuh bejadi Pengerami Pulau Bruit ba Balai Komuniti Kampung Tekajong, Pulau Bruit, kena Hari Lima.

Lebih 300 peranak ngelingi Pulau Bruit enggau Daro datai ngerichah pengerami nya ti nyadi pelasar besai meransang ekonomi komuniti kelimpah nyadi pematak dagang temuai ba tebing tasik Sarawak.

Entara aktiviti diatur nyengkaum lumba rayat, pemerindang main asal, pemandang enggau taklimat ari agensi perintah, pemerindang atas panggau ari bala penanyi, Mini Agrofest ti ngelaku asil utai tanam enggau pemakai tasik sereta chabut tikit benasip.

Pengerami nya mega richah nengah pemandang pelajar ari lima palan pelajar tinggi iya nya CENTEXs, Universiti Teknologi Sarawak (UTS), Sarawak Skills, Kolej Laila Taib sereta Palan Ngerembai Penerang Nasional (NADI).

Pengerami Pulau Bruit 2025 disadang terus nyadi pengerami ninting taun ti dianti mensia mayuh seraya nyagu Pulau Bruit nyadi siti ari palan pematak dalam kalinda dagang temuai nengeri. - EDISI UKAS