KUCHING: Pengawa ngatur Borneo Games Kuching 2025 terus nerima timbal positif ari bala atlit archery ti madah ke lumba nya ukai semina nalan bepekit tang mega nyadi peluang berega ngelala budaya, kandang menua enggau bakih baru ari rantau tu.

Atlet archery Kalimantan Timur, Rohani Sephia Ananda Hatta madah, lumba dipasuk iya sekali tu meri peneleba berega laban nya lumba antarabansa keterubah ba luar menua iya kenyau ari ngaul diri ba lumba nya ba taun 2013.

“Enti ba dalam nengeri aja, kitai berasai gaga ngelala kandang menua baru anang agi ba luar menua.

“Alhamdullilah, ditu agi ngena jaku ti nyau deka sebaka taja bisi bebida mimit.

“Aku mega ulih belajar budaya, pemakai enggau utai ti nyadi di Sarawak,” ku iya lebuh dirandau ba Lapang Sasar Memanah ditu kena Hari Lima.

Rohani Sephia mega muji fasiliti ti disediaka bala pengatur ungkup bala atlit chukup manah.

Nangkan nya, atlit ari Wilayah Persekutuan Labuan, Rizal Roslin muji penyikap pengatur ti diasai ke iya entara ti pemadu manah ti kala dipasuk iya ngelama tu.

“Tu keterubah iya aku masuk Borneo Games lalu Alhamdullilah naka diatu aku tepantup ati.

“Fasilii, endur diau, pemakai enggau ai irup, pengangkut enggau sukung bala pegawai chukup manah.

“Aku meri terima kasih ngagai Perintah Sarawak laban nyendiaka fasiliti pemadu manah ungkup atlit,” ku iya.

Ba penemu atlit Sarawak, Jaccard Lee, lumba tu peluang berega laban Borneo Games jarang diatur.

“Aku berasai temegah ulih ngari ke Sarawak. Latih ti diberi beguna endar lalu aku meda pengeran perintah nengeri meri perati ngagai lumba tu,” ku anak asal ari Miri nya ti udah tiga taun ngaul diri ba lumba archery lalu sebedau tu bemain bola tampar.

Atlit Sabah, Davian Jayden Chin ti udah tiga taun ngaul diri ba lumba archery mega bekunsi pengagit keterubah iya belumba di Kuching.

“Peneleba tu chukup ngasuh ati gagit lalu meri semangat baru. Taja pen bisi asai nangi laban bepekit enggau atlit menua luar tang aku belajar mayuh pekara baru,” ku Davian.

Semua atlit selubang penemu, Borneo Games meseti ditampung laban lumba tu ukai semina ngansah penau baru tang mega ngerapit kaul bebakih serantau nengah lumba. - EDISI UKAS