KUCHING: Proses 'skilling' enggau 're-skilling' pengereja pengawa beguna endar dikena napi ubah dunya gawa ti majak deras.

Menteri Pelajar, Inovasyen enggau Pemansang Penau Sarawak, Dato Sri Roland Sagah Wee Inn nyemetak madah, ubah dunya ti deras begunaka rayat sedia napi pemansang dudi hari.

“Profesyen ke bisi diatu nyangka enda sebaka dudi hari.

" Nya alai, rayat kitai meseti nengah proses 'skilling' enggau 're-skilling' ngambi nemban enggau pengawa dudi hari,”ku iya.

Iya madah munyi nya ba aum media serimbai Bejadi Program Industry Connect@Sarawak 2025 ditu, Hari Tiga.

Dato Sri Roland Sagah bela ngingatka pengeransing pemansang penau ukai semina rebak biak, tang mega ngaul semua renggat rayat ti ulih nyaup pengereja pengawa nengeri.

“Kitai deka rebak biak berati ke pekara tu positif ngambi sida ulih berengkah tumu agi laban proses skilling enggau re-skilling besai amat reti ungkup dudi hari kitai,” ku iya.

Nitih ku iya, jeman digital sereta peneras bekenaka teknologi Artificial Intelligence begunaka rayat landik sereta bepenemu baru luar ari silibus lama.

Pengeransing TalentCorp datai ke sekula sebagi ari inisiatif ti engkeman dikena nyikap rebak biak.

Kelimpah ari nembiak, iya bela nyemetak madah ke pemesai reti ngaul raban bukai baka indu ke deka gawa baru, raban veteran soldadu ke udah pinchin biak lalu sida ke udah lenyau pengawa.

Iya andal nengah kerejasama TalentCorp, Sarawak ulih negap ekosistem pemansang penau ti inklusif agi sereta responsif nipak guna industri maya hari tu enggau dudi hari.-EDISI UKAS