KUCHING: Kontinjen Brunei Darussalam likun datai ba Padang Bilun Antarabansa Kuching pukul 11:40 pagi Hari Satu ungkup nurun bepekit ba lumba serantau, Borneo Games Kuching 2025.
 
Penatai kontinjen nya disambut richah pengari Komiti Pengatur Borneo Games Kuching 2025 begulai enggau bala pegawai ari Opis Menteri Nembiak, Lumba enggau Pemansang Orang Sarawak.
 
Kontinjen Brunei ti datai ari atlit, jurulatih enggau pegawai tim ditaga nurun bepekit ba sekeda pekit lumba nya ti ngempuru bala atlit ari Sarawak, Sabah, Labuan, Kalimantan Timur enggau Brunei Darussalam.
 
Borneo Games Kuching 2025 diatur di Kuching sekali tu dikeandal ulih negap ke kaul serantau kelimpah nyadi kelang ngiga penau baru ba mayuh disiplin main enggau lumba.
 
Pekit besai nya deka diatur ari 24 nyentuk 28 September ba sekeda endur ngelingi Kompleks Lumba Petra Jaya.-EDISI UKAS