LAWAS: Pengerami bejadi Anjung Usahawan Kampung Pemukat Kuala Lawas kena Hari Minggu diatur richah enggau penatai lebih 500 peranak dia.
 
Pengerami nya dipenyadika Sapit Premier Sarawak ti mega Menteri Pengeraja Asal enggau Pemansang Mengeri Kedua sereta Menteri Dagang Antarabansa, Industri enggau Meranak Puku Sarawak, Datuk Amar Awang Tengah Ali Hasan disempulang bini, Dato Dayang Morliah Awang Daud.
 
Lebuh bejaku, Datuk Amar Awang Tengah madah ke Anjung Usahawan ti ditumbuh nya nyadi pelasar besap negap ke ekosistem dagang komuniti dia.
 
Ku iya, perintah nengeri meri perati khas ngagai pemansang sosioekonomi komuniti nyegkaum nyendiaka perengkaguna, bantu puu enggau skim jali muntang.
 
“Perintah Nengeri nengah Agro Bank enggau SEDC udah bejalaika Sarawak Mikro Kredit iya nya jali nadai bungai enggau enda ibuh jamin ungkup raban B40.
 
“Kitai deka meda orang dagang bumiputera ngena manah peluang tu,” ku iya.
 
Iya mega madah ke pemesai guna graduet universiti sereta abis sekula teknikal ngaul diri ba pengawa dagang ari bantu geran sereta saup pemansang pengelandik.
 
Ku iya, produk lokal patut diinjin nitih standard pengelikun enggau pemeresi ngambi ulih rembus makit besai agi nyengkaum antarabansa.
 
“Lawas bisi pengulih besai ari sukut eksport asil tasik, dagang temuai enggau industri mit. Kitai meseti ngubah ulah, tambah pengelandik enggau ransing gawa.
 
“Enti dikena manah, Lawas tau nyadi menua pegari,” ku iya madah baru.
 
Pengerami nya mega meda simbolik mangku tawak tujuh kali, nyua semilan kunchi bansal ngagai orang dagang, nyua sagu ati ngagai enam nembiak nyulut SPM 2024, sereta anugerah ngagai KRT Kampung Pemukat nyadi KRT pemadu nyulut renggat nengeri.
 
Masjid Nor Iman Kampung Pemukat mega diaku tiga bintang.
 
Sama datai, Direktor NRDA, Datu Ubaidillah Abdul Latif, Residen Bagi Menua Limbang, Unus Tambi, Sekretari Politik Premier Sarawak, Awgku Jinal Abedin Pengiran Dato Jawa, Pegawai Pelilih Lawas, Ladin Atok sereta bala tuai opis enggau tuai raban bansa bukai.-EDISI UKAS