MARUDI: Lima Tuai Ruang Bilik (KIR) tasah bah ti ngenduh ba Palan Ngenduh Sementara (PPS) Dewan Suarah Baram, Marudi, udah nerima bantu belanja penusaj datai ari inisiatif solidariti komuniti dia, kena Hari Minggu.
 
Bantu belanja nya disua Mandal Tuai Nembiak PBB Sarawak ti mega Kaban Kunsil Nebgeri (ADUN) Machan, Allan Siden Gramong, ngagai Pegawai Pelilih Marudi ti nyadi Chairman Komiti Penyangga Penusah Pelilih (JPBD) Marudi, Rose Edward Tarang, ngambi disua ngagai lima ruang bilik ti agi diau ba palan ngenduh nya.
 
Pengawa nyua bantu nya ngagai penerima udah dipenyadi Penulung Pegawai Tadbir Opis Pelilih Marudi, Fazzwan Yunus, enggau tim agensi-agensi di baruh JPBD Marudi ti datai meri sukung.
 
Ku Allan, bantu nya datai ari duit pupu serimbai Pengerami Makai SERUMPU diatur Raban Nembiak PBB Pampang N77 Telang Usan enggau N78 Mulu ti diatur malam Hari Enam tu tadi.
 
“Bantu tu engka mimit, tang chukup besai reti laban mandangka penyiru enggau semangat solidariti."
 
“Aku ngarap ke bant utu ulih ngelempungka tating belanja sida ti tasah, kelebih agi dikena meli barang diguna sekumbang diau ba PPS,” ku iya.
 
Berebak enggau nya, iya madah ke inisiatif baka nya mandangka Nembiak PBB ransing bejalaika tanggungpengawa sosial ngagai rayat, ukai semina lebuh penusah bah aja tang lebuh napi penusah bukai baka angus tauka rabat ba komuniti.
 
Nuju bala penerima, bantu nya dikearap ulih ngelempung tating belanja sekumbang diau dia, kelimpah berasai lantang mimit lebuh ninggalka rumah ketegal bah.
Seraya raban JPBD Marudi mega madah ke pengawa nganjung bantu pemakai ngagai peranak ti tasah bah ba pelilih nya udah belabuh kenyau dua hari ke udah.-EDISI UKAS