LAWAS: Program Juluk Madani Pelilih Lawas ulih nyadi pelasar ngerembaika polisi sereta inisiatif perintah terus ngagai rayat.
 
Sapit Premier Sarawak Datuk Amar Awang Tengah Ali Hasan madah, program nya meri penerang pasal bemacham inisiatif ti dipejalaika perintah.
 
“Mayuh inisiatif udah disediaka Perintah Sarawak Sarawak enggau Perintah Besai mungkur pengerai, ngintu pengelantang, pelajar enggau peluang ekonomi.
 
“Program baka tu ulih ngedutka seraka penerang entara perintah enggau rayat,” ku iya.
 
Iya bejaku munyi nya lebuh bejadika program diatur Opis Komunikasyen Komuniti (J-KOM) nya ditu, kena Hari Minggu.
 
Kaban Kunsil Nengeri (ADUN) Bukit Sari nya mega ngingatka rayat ngambi pintar nyerenih penerang ari media sosial laban bisi ti bula lalu tau ngasuh saru penemu.
 
Ku iya, pelasar rasmi baka UKAS, J-KOM enggau agensi perintah meri penerang pemadu manah endur ngulihka penerang amat.
 
Berebak enggau nya, Datuk Amar Awang Tengah madah politik meseti tegap ngambi ulih nempa pemujur dudi hari lalu meri pengandal ngagai pemeranak puku ungkup pemansang Sarawak.
 
Kelimpah ari nya, iya bisi ngenang pemesai guna pelajar enggau pengelandik rebak biak, nyengkaum peluang ti disedia nengah sekula antarabansa, universiti diempu perintah nengeri sereta CENTEXS.
 
Ku iya, lebih 700 graduet CENTEXS Lawas, enggau 78 peratus ari sida nya bulih kereja.
 
Ngenang pemansang infrastruktur, ku iya, projek Renggat 2 Waterfront Kuala Lawas, jematan Kuala Lawas, padang bilun baru sereta jalai alun besai benung digaga diatu.
 
Seraya Program Juluk Madani Lawas mega richah enggau pejalai ngelawa bansal bejual enggau pemandang ari bemacham agensi nyengkaum Baitulmal, PERKESO, Opis Akauntan Menua enggau Opis Pengintu Pengelantang Mensia Mayuh.
 
Sama datai, Residen Bagi Menua Limbang Unus Tambi, Sapit Direktor J-KOM Zon Sarawak Mohamad Shahrizan Putit, Sekretari Politik Premier Sarawak Awgku Jinal Abedin Pengiran Datuk Jawa, Pegawai Pelilih Lawas, Ladin Atok, Direktor NRDA, Datu Ubaidillah Abdul Latif, Temenggong Rosli Majid sereta bala tuai opis enggau tuai raban bansa.-EDISI UKAS