KUCHING: Palan Penyulut Teknikal Sarawak (CENTEXS) nanggam Sempekat Pemereti Ati  (MoU) begulai enggau Biro Indu Gerempung Nembiak Nasional Besatu Sarawak (SABERKAS) kena Hari Satu.
 
Sapit Menteri ba Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali madah ke kerejasama strategik nya siti pengawa besai nempa modal mensia bisi kualiti.
 
Iya nerang, nya ngerandang peluang baru ba pengawa negapka nembiak indu Sarawak nengah program latih pengelandik, teknologi sereta pemansang industri.
 
"Nengah MoU tu, bala kaban Biro Indu SABERKAS enggau indu di Sarawak deka bisi peluang ngulu lebih ari 600 program latin ti disediaka CENTEXS ba mayuh macham bidang belalauka pengelandik, teknologi enggau pemansang industri," ku iya.
 
Chairperson Biro Pekara Indu SABERKAS nya madah, kerejasama nya setipak enggau aspirasyen Perintah Sarawak nengah Strategi Pemansang Pengudah COVID-19 (PCDS) 2030, ti nyelinting tiga pugu iya nya pengelantang ekonomi, serangkung sosial sereta pemeruan rampa menua.
 
Ku iya, ari MoU nya, mayuh agi indu enggau nembiak ulih dipatih, ukai semina nambahka penatai pemisi diri enggau sida sebilik aja, tang mega gawa ke pemujur Sarawak nyapai status nengeri maju bepenatai pemisi tinggi manggai 2030. -EDISI UKAS