MIRI: Unit Komunikasi Awam Sarawak (UKAS) terus negapka atur gawa begulai enggau komuniti, kelebih agi ba kandang menua pesisir nengah bemacham aktiviti kreatif enggau chara ti ngelantangka rayat.
 
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, tuju program baka Kembara 169 nya ukai semina nabur penerang pasal agenda pemansang Perintah Sarawak aja, tang nyadi pelasar ngerapitka kaul entara agensi perintah enggau renggat baruh.
 
“Ukai semina ba pengawa nabar penerang agenda enggau pemansang perintah aja, tang mega kaul rat agi nengah atur gawa dipejalai ba program baka konvoi motosikal ti diatur kitai sehari tu,” ku iya.
 
Iya nyebut jaku nya lebuh dirandau pemberita pengudah Pengawa Nangguh Program Bakih UKAS Komuniti: Kembara 169 ditu Hari Minggu.
 
Datuk Abdullah mega madah, UKAS deka ngerembaika kaul komuniti ba aktiviti ti dikerindu nembiak baka lumba, seni panggau, belagu enggau teater.
 
“Ari ngaul diri terus baka tu, pengawa nabur penerang deka ngerinduka agi ngambi metodologi ukai semina nengah berita tauka jaku aja,” ku iya.
 
Nangkan nya, iya nyemetak madah ke UKAS deka nentuka penerang ditabur narit ati enggau meri pengelantang, nyengkaum nengah kelas tutorial, main digital sereta aktiviti bekaul ekonomi digital ti dikerindu raban nembiak.
 
Berindik ari nya ku iya, UKAS nyendiaka peluang ngagai nembiak, nyengkaum indu, datai meri penemu ti engkeman dipejalai ba renggat genturung pendiau, rumah panjai enggau
komuniti lokal.
 
“Enti bisi komuniti, raban nembiak kelebih agi indu, ti bisi perambu kediri, tau madah ngagai UKAS lalu kitai tau berandau ke chara ngatur program nya,” ku iya.
 
Dulu ari nya, Datuk Abdullah begulai enggau Sapit Menteri Pemansang Indu enggau Nembiak Mit, Datuk Rosey Yunus sereta Sapit Menteri Nembiak, Lumba enggau Pemansang Orang Dagang Sarawak, Datuk Dr Ripin Lamat bela datai bejadi ‘Flag Off’ di Waterfront Bekenu begulai enggau 169 ‘Riders’ ari Bagi Menua Miri.-EDISI UKAS