MIRI: Program Bakih UKAS 2025 “Kembara 169” diperati nyadi pelasar besai negap penyerakup komuniti pupu bansa enggau ngemau semangat penaluk.
Menteri Pengangkut Sarawak, Dato Sri Lee Kim Shin madah, program nya ukai semina aktiviti belepa aja, tang mai tuju pengelantang, kaul diri sebilik enggau penaluk ke menua.
“Taja semina ngena motosikal pengelama sejam aja, tang tu meri reti chukup besai laban mandangka penegap kaul enggau pengelantang semua raban bansa di Sarawak,” ku iya.
Iya nibar ke jaku nya ba mua mayuh rambau Pengawa Nangguh Bakih Unit Komunikasi Awam Sarawak (UKAS) Komuniti 2025 Kembara 169 di Permy Mall, Miri kena Hari Minggu.
Program ti ngempuruka komuniti bikers sereta nembiak IPTA enggau IPTS di Miri nya mega mandangka semangat Malaysia Madani enggau semangat Segulai Sejalai ti nyadi pugu pengelantang di nengeri tu.
Berebak enggau nya, Dato Sri Lee mega madah ke pekara pengelikun jalai alun enggau ngingatka raban nembiak enda ngereja pengawa enda menuku ti tau mai penusah.
Iya mega madah kediri andal ke program baka nya nipak ke juluk Strategi Pemansang Pengudah COVID-19 (PCDS) 2030 ti meri perati ngagai serangkung sosial enggau pemansang sebela selampur Sarawak.
Iya ngena peluang nya meri terima kasih ngagai UKAS enggau semua agensi ngaul diri ti udah nentuka pemujur program Bakih UKAS 2025 “Kembara 169”, lalu ngemau semangat taluk ke Tanah Kenyalang.
Sama datai, Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol, Residen Bagi Menua Miri, Galong Luang, Pegawai Pelilih Miri, Siti Rohanie Yusof enggau Sapit Direktor UKAS, Mohamed Faizal Shah Ali sereta temuai bukai.-EDISI UKAS
