MUKAH: Program Jelajah Jalinan Borneo Langgur Pemansang Malaysia Lumpar Ke-13 (RMK13) nyadi nalan beguna ngagai rayat Mukah nyada penemu enggau peminta sida terus ngagai Opis Menteri Ekonomi.
 
Sapit Menteri Ekonomi, Dato Hanifah Hajar Taib madah, randau betunga mua beguna endar nentuka langgur pemansang menua endang amat nipak peminta rayat ba renggat baruh.
 
“Semua timbal penemu ti diterima deka diripih nitih ni ke diguna pelilih menua lalu udah nya diserenih ngambi dipasuk ke dalam RMK13 ti disadang dibantai ba Parlimen bulan baru, sebedau diserenih Opis Menteri Pekara Wang ngambi bajet dikemendar,” terang iya.
 
Iya nerang pekara nya ba sesyen randau Jelajah Jalinan Borneo RMK13, ti diatur di Dataran Pehin Setia Raja, ditu kena Hari Enam.
 
Iya nyemetak madah ke Opis Menteri Ekonomi ngesan pengawa nyeraris polisi begulai enggau opis menteri bukai baka Pengerai enggau Pelajar, kelimpah nentuka pekara ti dibantai diberi perati nitih pematut.
 
“Kitai dekaka rayat ngasai ke diri dikaul ba pengawa ngaga pemutus, ukai semina nerima polisi aja,” ku iya.
 
Entara batang pekara ti dibantai baka perambu ngaga jalai dua begembar Mukah–Selangau.
 
Ku Temenggong Mukah, Hendi Suhai, pemansang deras baka projek industri, ladang sawit, institusye pelajar enggau sitak komersial di Mukah enggau ngelingi nya, projek jalai dua begembar sepanjai 70 kilometer enggau empat arung endang patut endar.
 
“Perambu tu ukai semina nyukung pemansang ekonomi di baruh Koridor Kuasa Ulih Dikena Baru Sarawak (SCORE) aja, tang mega ulih ngurangka penusah bebadi ti suah nyadi ba jalai nya.
 
“Aku ngarap ke tu ulih dibai nyadi agenda besai Opis Menteri Ekonomi,” ku iya.
 
Nimbal perambu nya, Sapit Tuai Sekretari (Polisi) Opis Menteri Ekonomi, Datuk Dr Zunika Mohamed madah ke pekara nya deka diperati enggau dikerandau begulai enggau Opis Kereja Raya (KKR).
 
“Perambu tu deka dipasuk ba rintai diperati opis menteri nentuka pematut iya dipasuk ke dalam RMK13.
 
“Enti enda ba taun 2026, engka taun nangkan nya laban RMK13 deka dipejalai ari 2026 nyentuk 2030,” terang iya.
 
Program nya mega digulu Kaban Kunsil Nengeri (ADUN) Tellian, Royston Valentine sereta Residen Bagi Menua Mukah, Datu Kueh Lei Poh.
 
Nya meri awak ngagai rayat bekunsi penemu, betanya enggau meri perambu ngemanahka agi servis perintah.
 
Jelajah Jalinan Borneo RMK13 Mukah nyadi endur ketiga pengudah Keningau, Sabah enggau Sri Aman, Sarawak ti mega dipenyadika Dato Hanifah. -EDISI UKAS