KUCHING: Dua kelai menua ba Mengeri Besai Kuching iya nya Jematan Darul Hana enggau Jematan Satok dipanchar chura kuning emas kena Hari Enam serimbai Bulan Ngeleda Riman Nembiak Mit ti diintu bulan September ninting taun.
 
Ku penerang DBKU, inisiatif nya nyadi sebagi ari program ‘Light It Up Walk’ diatur begulai Gerempung Riman Nembiak Mit Nengeri Sarawak (SCCS) enggau Dewan Bandaraya Kuching Utara (DBKU) enggau tuju marit mayuh agi komuniti ngeleda ke pemedis bala nembiak ti ditepan penyakit riman sereta meri peransang ngagai sida enggau orang sebilik.
 
“Chura kuning emas ti dikena mai reti pengarap, pengering enggau solidariti ungku[ bala ‘bujang berani’ ti benung beretan ngelaban penyakit tu,” terang penerang nya.
 
DBKU mega madah ke raban sida seruran ransing nyukung pengawa ti marit komuniti ngeleda pasal pengerai, pengelantang enggau solidariti ngagai raban ti begunaka nya.
 
Pengawa begulai ngatur program baka nya mandangka kerejasama rat entara agensi perintah, gerempung ukai dikuasa perintah enggau komuniti ungkup pemaik semua.
 
Datai ngerichah program nya Direktor DBKU, Ramzi Abdillah, begulai enggau bala pengari ari SCCS.
 
Sama datai, Sapit Direktor Unit Servis Infrastruktur DBKU, Faizal Adenan enggau Sapit Direktor Unit Servis Komuniti DBKU, Rudzaimeir Malek.-EDISI UKAS
 
Gambar: DBKU