KUCHING: Pengawa ngintu Hari Tungkul Atau Sedunya 2025 nyadi pelasar beguna nambahka pengeleda ke pemesai guna nyaga pengerai tungkul atau sereta meransang rayat Sarawak ngemeran gaya idup bepengerai.
 
Sapit Premier Sarawak, Datuk Amar Profesor Dr. Sim Kui Hian madah, penyakit tungkul atau terus nyadi pun pemati lumur satu di Sarawak enggau Malaysia, nya kebuah genap komuniti patut siru agi nyaga pengerai diri.
 
“Hari Tungkul Atau Sedunya ba selampur dunya, lalu taja kitai ba puak kampung Borneo, Sarawak tetap enda tinggal ngambi bagi laban pengerai tungkul atau nya pugu nempa menua bansa,” ku iya lebuh bejadi Hari Tungkul Atau Sedunya 2025 di Balai Komuniti Kuching kena Hari Minggu.
 
Datuk Amar Profesor Dr. Sim, ti mega Sapit Chairman Yayasan Tungkul Atau Sarawak, nerangka penyakit tungkul atau diatu majak raya ketegal gaya idup moden ti nyadi ke pun ngagai empat pekara, dikumbai “3+1” iya nya darah tinggi (1 dalam 3 rayat), kolesterol tinggi (1 dalam 3 rayat), diabetes (1 dalam 6 rayat) enggau obesiti tauka kelalu gemuk (1 dalam 2 rayat).
 
Iya meransang serap komuniti ngesan tanggungpengawa nyaga pengerai diri enggau seruran ngemeran gaya idup bepengerai.
 
Datuk Amar Profesor Dr. Sim mega madah, pemayuh pesakit kardiovaskular majak nambah ninting taun ti ngujungka Palan Tungkul Atau Sarawak seruran bededat enggau pesakit kenyau ari dibuka lebih dua puluh taun ke udah.
 
“Kenyau ari ditumbuh ba taun 2001, lebih 200,000 rayat Sarawak udah berubat ba Palan Tungkul Atau.
 
“Enti nadai perengkaguna tu, engka mayuh enda ulih idup. Tu mih kebuah pengawa ngintu Hari Tungkul Atau Sedunya chukup beguna dikena nambahka pengeleda komuniti,” ku iya nyemetak.
 
Sama datai bini Sapit Premier Sarawak Dato Enn Ong Siok Ean, Datuk Bandar Majlis Bandaraya Kuching Selatan (MBKS) Dato Wee Hong Seng, enggau Pemegai Taruh Kaunsil Yayasan Tungkul Atau Sarawak Dato Anne Teng.-EDISI UKAS