BINTANGOR: Sepenyampau RM41,500 diagih nengah geran Projek Mit Pemansang Menua Pesisir (MRP) ngagai 10 penerima ngaul sekula, gerempung ukai dikuasa perintah (NGO) enggau Kawasan Rukun Tetangga (KRT) ba sitak Kunsil Nengeri (DUN) Meradong.
 
Geran nya udah disua Kaban Kunsil Nengeri (ADUN) Meradong, Datuk Ding Kuong Hiing di Palan Servis DUN Meradong kena Hari Empat.
 
Ku Datuk Ding, tetiap peminta MRP patut disempulang tuju ti nyengala enggau spesifikasi silik ngambi belanja ti dikemendar ulih dikena komuniti enggau manah.
 
“Perintah nengeri mantu komuniti lokal nengah MRP bejalaika projek mit ti meri pemaik terus, nyengkaum ngemanah infrastruktur, pelajar, ngintu pengelantang enggau aktiviti sosial komuniti dia,” terang iya.
 
Iya mega ngingatka semua penerima merambu peminta enggau silik sereta realistik, berundingka peminta komuniti menua enggau ngena agih belanja ti diterima enggau manah, lurus sereta bisi tanggungpengawa.
 
“Aku ngarap ke tetiap belanja ti dikena endang meri pemaik ngagai komuniti ti diari ke kitai lalu ulih nambahka pengelantang rayat,” ku iya. -EDISI UKAS